दुबै डोज भ्याक्सिन लगाएपछि पनि संक्रमित जीवा लामिछानेको ‘कोभिड अनुभव’
प्रकाशित मिति : भाद्र ३०, २०७८ बुधबार
कोभिड संक्रमणबाट निको भएपछि जीवा लामिछानेले पोष्ट गरेको तस्वीर ।
(जर्मनीमा बस्दै आउनुभएका नेपाली उद्यमी एवं एनआरएनएका भूतपूर्व अध्यक्ष जीवा लामिछानेले कोरोनाबिरुद्धको दोश्रो डोज लगाइसकेको पाँच महिना पूरा भइसकेको थियो । तर अगस्तको तेश्रो साता उहाँमा कोरोनाको संक्रमण पुष्टी भयो । त्यसपछि उहाँले भोगेको अवस्था र ५ वटा सुझावबारे उहाँले सामाजिक सञ्जालमा पोष्ट गरेको सामाग्री खसोखासका पाठकका लागि पनि उपयुक्त हुने ठानेर प्रकाशित गरेका छौं । – सम्पादक)
दोश्रो डोज खोप लगाएकाहरुलाई पनि कोभिड संक्रमण हुन सक्छ ।
२० अगस्तमा अन्तराष्ट्रिय उडान गर्नु पर्ने भएकोले एकदिन अघि पीसीआर टेस्ट गराएँ । दुवै डोज खोप लगाएको र कोरोना सम्बन्धि सावधानी अपनाउने मामिलामा म निक्कै सजग पनि रहेकोले नेगेटिभ नतिजा आउने कुरामा म ढुक्क थिएँ । मैले दोश्रो डोज खोप लगाएको पनि पांच महिना पुरा भै सकेको थियो । यस बिचमा पटकपटक एन्टीबडी परिक्षण पनि गराएको थिएँ । शरिरमा प्रसस्त एन्टीबडी बनेर कोभिड विरुद्ध प्रतिरक्षात्मक क्षमता रहेको देखिएको थियो ।
तर सोचे जस्तो संधै कहाँ हुन्छ र ? पिसिआर रिपोर्ट पोजिटिभ देखियो ।
त्यस दिनको पिसीआर रिपोर्टमा सिटि भ्यालु ३५.२६ देखिएको र कहिलेकाहीं गलत नतिजा पनि आउन सक्छ भन्ने सुनेकोले भोलिपल्ट बिहान फेरी स्वाव टेस्ट गराएँ ।
दोश्रो रिपोर्ट पनि पोजिटिभ नै देखियो र भोलिपल्टको सिटि भ्यालु २३ मा झरेकोले कोरोनाको संक्रमण सुरु हुने क्रममा रहेको थाहा भयो । सीटि भ्यालु कम हुनु भनेको कोरोनाको तिब्रता भन्दा पनि त्यसले अरुलाई सार्न सक्ने संक्रामकता बढी हो भनेर बुझ्नु पर्ने रहेछ ।
२० अगस्तको उडानलाई रद्द गरेर आफुलाई होम आइसोलेशनमा राखें ।
तेश्रो दिन बिहान उठ्दा जिउ दुख्ने र सुख्खा खोकी लाग्ने क्रम सुरु भयो । खोकी लाग्दा छाती दुखे जस्तो भएकोले छातीरोग बिशेसज्ञसंग परामर्श गरें । उहाँले छाती परिक्षण गर्ने सल्लाह दिनु भयो ।
एक्सरे गर्दा केहि नदेखिए पनि सिटि स्क्यानमा भने देब्रे पट्टिको फोक्सोमा सानो दाग देखिएकोले कोभिडका कारण निमोनिया सुरु हुन लागेको आशंका गरि त्यसै अनुरुप औषधिहरु चलाइयो । मेरो सिटि स्क्यानको रिपोर्टमा बाया फोक्सोमा कोभिड १९ निमोनियाको जस्तो प्याचहरु देखिएको उल्लेख गरिएको थियो ।
चौथो दिनदेखि जिब्रोले स्वाद थाहा पाउन छाड्यो ।
दशौँ दिनमा पुन: पिसीआर टेस्ट गर्दा नतिजा नेगेटिभ आयो । तर पनि खोकी लाग्ने र जिउ दुख्ने क्रम रोकिएको थिएन ।
मलाई देखिएका कोभिडका लक्षणहरु माइल्ड प्रकृतिका हुन् । यसो हुनुमा दुवै डोज खोप लगाउनु मुख्य कारण हो भन्ने लागेको छ । म अहिले पूर्णरुपमा स्वस्थ्य भएको छु । यद्यपी रक्त परिक्षणमा केहि सूचकहरु (डी-डाइमर,फेरिटिन र एलडीएच लेभेल) अझै केहि उच्च छन् ।
कोभिड १९ लागेर स्वस्थ्य भएको अनुभवका आधारमा मेरा केहि सुझावहरु यस प्रकारका छन् :
– सम्भव भएसम्म खोप लगाउनु होला । खोप लगाउनु हुँदैन भन्नेहरुको जमात पनि ठुलो छ ।
– कोभिडमा खोकी लागेर छाती दुख्यो भने तुरुन्तै चिकित्सकसंग परामर्श गर्नु होला । यस्तो अवस्थामा निमोनियाको ठुलो सम्भावना हुँदो रहेछ । निमोनियाको लेभल बमोजिम फोक्सोको क्षति निर्धारण हुने भएकोले सुरु अवस्थामा नै उपचार गरि हाल्नु पर्दछ ।
– बिरामी हुँदा धेरै थरिका सल्लाह/सुझाव आउने रहेछन । सम्बन्धित बिशेसज्ञको सल्लाह मात्रै ग्रहण गर्नु होला ।
– बिरामीको शारीरिक अवस्था, पुराना रोगको हिस्ट्री आदिका आधारमा उपचार पद्धति अपनाउनु पर्ने भएकोले मलाई यसो गर्दा ठिक भएको थियो तपाईंले पनि यहि पद्दति अवलम्बन गर्नुहोस् भनेर सुझाव-सल्लाह नदिनु नै जाति हुन्छ ।
– आत्मबल उच्च राख्नुहोला । सावधानी अपनाउनु होला । कोरनासंगको लडाई जित्न सकिन्छ ।
कोरोना संक्रमण हुँदा मेरो स्वास्थ्यबारे चासो राखेर मलाई हौसला र उत्प्रेरणा दिनु हुने सम्पूर्ण सर्हिदयी मित्रहरुलाई हार्दिक आभार व्यक्त गर्दछु ।