कोरोनाबिरुद्धको फाइजर भ्याक्सिनलाई अमेरिकामा एफडीएबाट प्रयोगका लागि पूर्ण स्वीकृति
प्रकाशित मिति : भाद्र ७, २०७८ सोमबार
अमेरिकाको औषधी नियामक एजेन्सी एफडीएले कोरोनाबिरुद्धको फाइजर भ्याक्सिनलाई प्रयोगका लागि पूर्ण स्वीकृति प्रदान गरेको छ । गत डिसेम्बरमा यो भ्याक्सिनलाई अमेरिकामा आपतकालिन प्रयोगको स्वीकृतिमात्र प्रदान गरिएको थियो ।
भ्याक्सिनको पूर्ण स्वीकृतिलाई भ्याक्सिन लगाउने दर बृद्धि हुने कोसेढुंगाका रुपमा हेरिएको छ । छोटो समयमा भ्याक्सिनलाई पूर्ण स्वीकृति प्रदान गरिएको एफडीएको इतिहासमा नै यो पहिलोपटक हो । फाइजरले पूर्ण स्वीकृतिका लागि आवेदन दिएको ४ महिनाभन्दा पनि कम समयमा भ्याक्सिनलाई स्वीकृति प्रदान गरिएको हो ।
एफडीएले यसअगाडि सेप्टेम्बरको पहिलोसातासम्म भ्याक्सिनलाई पूर्ण स्वीकृति प्रदान गर्ने आन्तरिक डेडलाइन तय गरेको थियो । तर उक्त डेडलाइन अगाडि नै भ्याक्सिन स्वीकृत गरिएपछि अझैधेरै अमेरिकनहरुले ढुक्क भएर भ्याक्सिन लगाउने अपेक्षा गरिएको छ ।
अब केही विश्वविद्यालयहरु र अस्पतालहरुले भ्याक्सिन अनिवार्य गर्ने अपेक्षा गरिएको छ । पेन्टागनले पनि भ्याक्सिन अनिवार्य गर्ने योजना बनाएको छ । अब फाइजरले एफडीएसमक्ष भ्याक्सिनको तेश्रो डोजको स्वीकृतिका लागि आवेदन दिने अपेक्षा गरिएको छ ।
भ्याक्सिनको दोश्रो डोज लगाएको ८ महिना नाघिसकेकाहरुले बुस्टर डोजका लागि तयार रहन र सेप्टेम्बर २० देखि बुस्टर डोज लगाउन सुरु गरिने बाइडेन प्रशासनले बताइसकेको छ । फाइजरले तेश्रो डोज सुरक्षित र प्रभावकारी भएको तथ्यांक आगामी साता एफडीएमा बुझाउने अपेक्षा गरिएको छ ।
एफडीएले प्रतिरोध क्षमता कमजोर भएकाहरुलाई फाइजर र मोडेर्नाको तेश्रो डोज स्वीकृत गरिसकेको छ । यो निर्णयलाई सीडीसीले पनि स्वीकृत गरेपछि कमजोर प्रतिरोधात्मक क्षमता भएकाहरुलाई तेश्रो डोज दिन सुरु गसिकिएको छ ।
नियामकहरुले मोडेर्ना भ्याक्सिनको पूर्ण स्वीकृतिका लागि पनि काम गरिरहेका छन् । तर अबको केहीसातापछिमात्र मोडेर्नाले पूर्ण स्वीकृति पाउने अपेक्षा गरिएको छ । मोडेर्नाले तेश्रो डोजको स्वीकृतिका लागि आगामी सेप्टेम्बरमा आवेदन दिने अपेक्षा गरिएको छ ।