जोन्सन एण्ड जोन्सनको कोरोनाबिरुद्धको भ्याक्सिनको एउटै डोजले ज्यान जोगिने
प्रकाशित मिति : माघ १६, २०७७ शुक्रबार
जोन्सन एण्ड जोन्सनको कोरोनाबिरुद्धको भ्याक्सिनको एउटै डोजले व्यक्तिलाई अस्पताल भर्ना हुन र ज्यान गुमाउनबाट जोगाउने पुष्टी भएको छ । कम्पनीले शुक्रबार दिएको जानकारी अनुशार यो भ्याक्सिनको एउटा डोजमात्र लगाएपनि व्यक्ति कोरोना संक्रमणका कारण सिकिस्त हुनबाट बच्नेछन् ।
बेल्जियममा रहेको जान्सेन फार्मास्युटिकल्ससँग मिलेर भ्याक्सिन निर्माण गरेको जोन्सन एण्ड जोन्सनले आगामी साता अमेरिकाको खाद्य तथा औषधी विभागमा प्रयोगको अनुमतिका लागि आवेदन दिने भएको छ । स्वीकृत भएमा यो अमेरिकामा प्रयोगका लागि स्वीकृति पाउने कोरोनाबिरुद्धको तेश्रो भ्याक्सिन हुुनेछ ।
अहिले अमेरिकामा फाइजर र मोडेर्नाका भ्याक्सिन वितरण भइरहेको छ । अहिलेसम्म अमेरिकामा झण्डै ५० मिलियन भ्याक्सिनका डोज डेलिभर भइसकेको छ भने २१ मिलियन भन्दा बढीले भ्याक्सिन लगाइसकेका छन् । दुईवटै डोज लगाउनेको संख्या पनि ४ मिलियन नाघिसकेको छ ।
जोन्सन एण्ड जोन्सनको अमेरिकामा भएको तेश्रो चरणको क्लीनिकल परीक्षणमा यो भ्याक्सिन कोरोना संक्रमणबाट सामान्यदेखि सिकिस्त बिरामी हुनबाट रोक्नमा ७२ प्रतिशत प्रभावकारी देखिएको छ । सिकिस्त बिरामी हुनबाट जोगाउन भने भ्याक्सिन ८५ प्रतिशत प्रभावकारी देखिएको छ ।
भ्याक्सिनको क्लीनिकल परीक्षणमा अमेरिका, दक्षिण अफ्रिका र अन्य ल्याटिन अमेरिकी देशका ४४ हजार भन्दा धेरै सहभागी भएका थिए । अमेरिकामा ७२ प्रतिशत प्रभावकारी देखिएको भ्याक्सिन विश्वब्यापी रुपमा हेर्दा ६६ प्रतिशत र दक्षिण अफ्रिकामा ५७ प्रतिशत प्रभावकारी देखिएको छ ।
अहिलेसम्म जोन्सन एण्ड जोन्सन भ्याक्सिनको एउटामात्र डोज लगाएको कोहीपनि व्यक्ति कोरोनाका काराण सिकिस्त भएर अस्पतालमा भर्ना हुनु परेको छैन । यो भ्याक्सिनको कुनै मुख्य साइड इफेक्ट पनि देखिएको छैन । कुनै एलर्जिक प्रतिकृया पनि देखिएको छ ।
दक्षिण अफ्रिकामा देखिएको कोरोनाको नयाँ प्रकारबिरुद्ध भने यो भ्याक्सिनको प्रभावकारिता केही कम देखिएको छ । तर त्यहाँ पनि यो भ्याक्सिन लगायतका कोही व्यक्ति कोरोनाका कारण अस्पताल भर्ना भएका छैनन् भने कोरोनाका कारण कसैको पनि ज्यान गएको छैन ।
फाइजर र मोडेर्नाका भ्याक्सिनहरु दुईदुई डोज दिनुपर्ने भएपनि जोन्सन एण्ड जोन्सनको भ्याक्सिन एकडोज दिए पुग्छ । सामान्य तापक्रममा राखे पुग्ने यो भ्याक्सिन भण्डारणमा समेत सहज छ । तर फाइजर र मोडेर्नाका तुलनामा जोन्सन एण्ड जोन्सनको भ्याक्सिन कम प्रभावकारी देखिएको छ ।