ट्रम्पका न्यायमन्त्री विलियम बारले दिए राजिनामा
प्रकाशित मिति : मंसिर २९, २०७७ सोमबार
ट्रम्प प्रशासनका न्यायमन्त्री अर्थात् एटोर्नी जनरल बिलियम बारले राजिनामा दिएका छन् । अमेरिकामा एटोर्नी जनरल नै डिपार्टमेन्ट अफ जस्टिसका प्रमुख हुन् भने यो क्याबीनेटको पद हो ।
डोनाल्ड ट्रम्पको वफादार भएर काम गरेका उनको पछिल्लो चरणमा ट्रम्पसँग चुनावबारे मतभेद भएको थियो । ट्रम्पले चुनावमा धाँधली भएको बताइरहँदा डिपार्टमेन्ट अफ जस्टिसले नतिजा नै परिवर्तन हुने गरी चुनावमा धाँधली भएको कुनै प्रमाण नभेटिएको घोषणा गरेको थियो ।
डोनाल्ड ट्रम्पले चुनावमा ब्यापक धाँधली भएको भन्दै मुद्दामामला गरिरहेको सन्दर्भमा विलियम बारको यो घोषणाले ट्रम्प आक्रोशित भएका थिए । उनले चुनावमा धाँधलीका लागि एफबीआई र डिपार्टमेन्ट अफ जस्टिससमेत संलग्न भएको आरोप लगाएका थिए ।
ट्रम्पले गतबर्षको फरबरीमा बारलाई महान्यायाधिवक्तामा नियुक्त गरेका थिए । बारको राजिनामा पछि ट्रम्पले आफूहरुको सम्बन्ध निकै राम्रो रहेको भन्दै ट्वीट गरेका छन् । उप महान्यायाधिवक्ता जेफ रोसेनले अब कार्यकारी महान्यायाधिवक्ताका रुपमा काम गर्नेछन् ।
Just had a very nice meeting with Attorney General Bill Barr at the White House. Our relationship has been a very good one, he has done an outstanding job! As per letter, Bill will be leaving just before Christmas to spend the holidays with his family…
— Donald J. Trump (@realDonaldTrump) December 14, 2020
बारले सन् १९९१ मा राष्ट्रपति जर्ज बुसका पालामा पनि महान्यायाधिवक्ताका रुपमा काम गरेका थिए । बार रिपब्लिकन पार्टीका सदस्यसमेत हुन् ।