राष्ट्रपति ट्रम्पबाट सर्वोच्चको न्यायाधिसमा एमी कोनी ब्यारेटको नाम सिफारिस
प्रकाशित मिति : आश्विन १०, २०७७ शनिबार
अमेरिकी राष्ट्रपति डोनाल्ड ट्रम्पले सर्वोच्च अदालतको न्यायाधिसमा एमी कोनी ब्यारेटको नाम सिफारिस गरेका छन् । न्यायाधिस रुथ बेडर गिन्सबर्गको निधनपछि रिक्त स्थानमा ब्यारेटको नाम सिफारिस गरिएको हो ।
पुनरावेदन अदालतमा रहेकी कन्जरभेटिभ न्यायाधिस ब्यारेटको नाम सिफारिस गर्दै ट्रम्पले गौरवपूर्ण क्षण भएको वताएका छन् । ब्यारेट विशाल बौद्धिकता भएकी महिला भएको ट्रम्पले टिप्पणी गरेका छन् ।
ट्रम्पको यो सिफारिस इतिहासको महत्वपूर्ण समयमा गरिएको छ । चुनाव नजिकिदै गर्दाभएको यो सिफारिसलाई समालोचनात्मक तरिकाले हेरिएको छ । अब ब्यारेटको नाममा सिनेटमा मतदान हुनेछ ।
सिनेटमा सामान्य बहुमत प्राप्त भएको खण्डमा ब्यारेट अमेरिकाको सर्वोच्च अदालतको न्यायाधिसमा नियुक्त हुनेछिन् । उनको नियुक्तीपछि सर्वोच्चमा रिपब्लिकन नियुक्त न्यायाधिसको संख्या ६ र डेमोक्र्याट्स नियुक्त न्यायाधिसको संख्या ३ पुग्नेछ ।
४८ बर्षकी ब्यारेटलाई सेभेन्थ सर्किट कोर्टमा डोनाल्ड ट्रम्पले नै सिफारिस गरेका थिए । पुनरावेदनमा सन् २०१७ को अक्टोबर ३१ मा उनको नियुक्ती सिनेटले पारित गरेको थियो ।
सन् २०१६ मा न्यायाधिस एन्टोनिन स्कालियाको निधन फरबरीमा हुँदा तत्कालिन राष्ट्रपति बराक ओबामाले गाल्र्याण्डलाई नोमिनेट गरेका थिए । तर सिनेटले चुनाव अगाडि न्यायाधिसको नाममा मतदान गरेन । पछि डोनाल्ड ट्रम्प नियुक्त भइसकेपछि निल गोर्सचलाई नियुक्त गरेका थिए भने सिनेटले पनि उनको नाम पारित गरेको थियो ।
बिल क्लिन्टनले गेन्सबर्गलाई सन् १९९३ मा सर्वोच्च अदालतको न्यायाधिस नियुक्त गर्दा पनि झण्डै ७० दिन लागेका थियो ।
यसअगाडि सन् २०१८ मा रिटायर्ड भएका एन्थोनी केनेडीको स्थानमा पनि डोनाल्ड ट्रम्पले नै न्यायाधिस नियुक्त गरेका थिए । एन्थोनी केनेडीलाई रोनाल्ड रेगनले नियुक्त गरेपनि उनी सधै कन्जरभेटिकका पक्षमा भने उभिएका थिएनन् । बराक ओबामाको कार्यकालमा भने सर्वोच्च अदालतमा २ जना न्यायाधिस नोमिनेट गरेका थिए, जसमा दुबैजना महिला थिए ।