१२ सयको चेक नसमेटिएको रिपब्लिकन बिलमा काम गुमाएकालाई ३ सय, पारित होला ?
प्रकाशित मिति : भाद्र २३, २०७७ मंगलबार
अमेरिकी सिनेटका रिपब्लिकनहरुले दोश्रो चरणको १२ सय डलरको राहत चेक नसमेटिएको राहत प्याकेज बिल सार्वजनिक गरेका छन् । तर यो प्याकेजमा गत जुलाईमा समाप्त भएको काम गुमाएकाहरुलाई दिइएको अतिरिक्त रकमको प्रावधानलाई भने कायम गरिएको छ ।
जुलाईको अन्त्यसम्म काम गुमाएकाहरुले अतिरिक्त साप्ताहिक ६ सय डलर पाएकोमा रिपब्लिकन बिलमा भने त्यसलाई घटाएर ३ सय डलरमात्र कायम गरिएको छ । पेचेक प्रोटेक्सन प्रोग्रामका लागि भने २५८ बिलियन डलर छुट्याइएको बिलको सारांशमा जनाइएको छ ।
यसैबीच सिनेटमा रिपब्लिकन नेता मिच म्याक्कोनेलले उक्त बिलमा यसैसाता मतदान गरिने बताएका छन् । तर सिनेटबाट पारित हुने सम्भावना भने कम रहेको छ । किनभने उक्त बिल सिनेटबाट पारित हुनका लागि समेत डेमोक्रेटिक सांसदको साथ आवश्यक रहेको छ ।
उक्त बिल पारित गर्नका लागि ६० भोटको आवश्यकता पर्छ । तर रिपब्लिकनसँग सिनेटमा उक्त संख्या छैन । डेमोक्र्याट्सहरु उक्त रिपब्लिकन बिलको पक्षमा छैनन् । दुईदलबीच अहिलेसम्म कुनै पनि बिलमा सहमति कायम हुन सकेको छैन ।
बिलले काम गुमाएकाहरुलाई डिसेम्बर २७ सम्मका लागि अतिरिक्त साप्ताहिक ३ सयको व्यवस्था गरेको छ भने डेढ लाख डलरभन्दा कम पीपीपी ऋण लिएका विजनेशहरुलाई मिनाहाका लागि सहज बनाएको छ । त्यस्तै हुलाक सेवा र स्कुल लगायतका लागि समेत राहतको व्यवस्था गरिएको छ ।