भर्जिनिया र मेरिल्याण्डसहित ३१ राज्यबाट न्युयोर्क आउने अनिवार्य क्वारेन्टीनमा बस्नुपर्ने
अब भर्जिनिया र मेरिल्याण्डबाट न्युयोर्क आउनेहरुसमेत अनिवार्य १४ दिन क्वारेन्टीनमा बस्नुपर्ने भएको छ । मंगलबार न्युयोर्कले क्वारेन्टीनमा बस्नुपर्नेको सुचीमा १० वटा नयाँ राज्यहरु थपेको हो ।
यसअगाडि २२ वटा राज्यहरु सुचीमा रहेकोमा मंगलबार १० वटा थपिएको छ भने एउटा हटाइएको छ । थपिएका राज्यहरुमा मेरिल्याण्ड, भर्जिनिया, अलास्का, डेलावर, इन्डियाना, मिजौरी, मोन्टाना, नर्थ डाकोटा, नेब्रास्का र वासिंटन रहेका छन् ।
यसअगाडिदेखि सुचीमा रहेका राज्यहरुमा अलाबामा, अर्कान्सास, एरिजोना, क्यालिफोर्निया, फ्लोरिडा, जर्जिया, आयोवा, आइदायो, कन्सास, लुजियाना, मिसिसिपी, नर्थ क्यारोलिना, साउथ क्यारोलिना, न्यु मेक्सिको, नेभाडा, ओहायो, ओक्लाहोमा, टेनेसी, टेक्सास, युटाह र विसकन्सिन रहेका थिए ।
अब यी ३१ वटा राज्यबाट न्युयोर्क आउनेहरुले न्युयोर्क आउनासाथ आफू आएको स्थानको विवरण र जाने स्थानको विवरणसहित फर्म भरेर सरकारी अधिकारीहरुलाई बुझाउनुपर्छ । साथै उनीहरु न्युयोर्क आइसकेपछि अनिवार्य १४ दिन क्वारेन्टीनमा बस्नुपर्ने नियम रहेको छ ।
न्युयोर्कका अतिरिक्त न्युजर्सी र कनेक्टिकटले पनि संयुक्त रुपमा यो नियम लागु गरेका छन् । अर्थात् उल्लेखित ३१ राज्यबाट तीनवटै राज्यमा आउनेहरु १४ दिन अनिवार्य क्वारेन्टीनमा बस्नुपर्छ ।
कुनै बेला कोरोना महामारीको इपीसेन्टर रहेको न्युयोर्कमा अहिले परीक्षण गरिएकाहरुमध्ये एकप्रतिशतभन्दा कममा कोरोना संक्रमण देखिएको छ । यसैबीच न्युयोर्कका गभर्नर कुमोले न्युयोर्कमा कोरोनाको दोश्रो छाल अवश्यंभावी रहेको बताएका छन् ।
