४० प्रतिशत कोरोना संक्रमितमा लक्षण नदेखिने तर सार्ने सम्भावना ७५ प्रतिशत : सीडीसी
कोरोना संक्रमितहरुमध्ये झण्डै ४० प्रतिशतमा कुनै पनि लक्षण नदेखिने अमेरिकन सीडीसीको नयाँ निर्देशिकामा जनाइएको छ । तर लक्षण नभएका कोरोना संक्रमितबाट अरुमा सर्ने सम्भावना भने ७५ प्रतिशतसम्म हुने सीडीसीले जनाएको छ ।
विगतमा कुनै लक्षण नभएका कोरोना संक्रमितको तथ्यांक ३५ प्रतिशत रहेको जनाएकोमा सीडीसीले उक्त दरमा ५ प्रतिशत बढाएर ४० प्रतिशत कायम गरेको छ । विगतमा भने सीडीसीले लक्षण नभएकाहरुबाट अरुमा सर्ने सम्भावना शतप्रतिशत रहेको बताएकोमा अहिले भने २५ प्रतिशत कम गरेको छ ।
सीडीसीले कोरोना संक्रमितमध्ये शुन्य दशमलव ६५ प्रतिशत व्यक्तिकोमात्र मृत्यु हुने आकलन प्रस्तुत गरेको छ । अमेरिकाका विभिन्न राज्यमा कोरोना संक्रमितको संख्या बृद्धि भइरहँदा विश्व स्वास्थ्य संगठन र अमेरिकन सीडीसीले नयाँ निर्देशिका जारी गरेको हो ।
गत जुलाई ९ मा विश्व स्वास्थ्य संगठनले निर्देशिकामा अपडेट गर्दै हावाको माध्यमबाट समेत कोरोना फैलिने जनाएको थियो । हावामा तैरिने सुक्ष्म कणहरुबाट कोरोना भाइरस टासिंदा उक्त कणहरुमार्फत संक्रमण फैलिने जनाएको थियो ।
विश्वभरका सयौं वैज्ञानिकहरुले हावाको माध्यमबाट समेत कोरोना संक्रमण फैलिने निष्कर्ष निकालेपछि विश्व स्वास्थ्य संगठनले निर्देशिकामा परिमार्जन गरेको हो ।
कोरोनाको संक्रमणबाट बालबालिकाहरुमा गम्भिर प्रकारको अवस्था र मृत्युको खतरा कम रहेको बताएको छ । तर उनीहरुले लक्षणविना नै जोखिमपूर्ण जनसंख्यालाई कोरोना सार्नसक्ने भएकाले सचेत हुनुपर्ने सीडीसीको निर्देशिकामा जनाइएको छ ।
