उपत्याकामा सवारी दुर्घटनामा परि ,चालु आर्थिक वर्षमा २२२ जनाको मृत्यु
प्रकाशित मिति : जेष्ठ २४, २०७६ शुक्रबार
चालू आर्थिक वर्षको वैशाख मसान्तसम्म काठमाडौँ उपत्यकामा सवारी दुर्घटनाका कारण २२२ को मृत्यु भएको छ । जसमध्ये २११ ले वैशाख मसान्तसम्म र जेठ महीनामा मात्र ११ जनाले ज्यान गुमाएका हुन् ।
महानगरीय ट्राफिक प्रहरी महाशाखाका अनुसार मृत्यु हुनेमा १७७ पुरुष र ४५ महिला रहेका छन् । दुर्घटनाको मुख्य कारण भने तीव्र गति र चालकको लापरवाही रहेको महाशाखाले जनाएको छ । “फराकिलो बाटो र तीव्र गतिका कारण धेरै मानिसको सवारी दुर्घटनामा ज्यान गएको छ,” महाशाखाका प्रमुख एवं प्रहरी वरिष्ठ उपरीक्षक वसन्तकुमार पन्तले भने ।
चालू आर्थिक वर्षमा मोटरसाइकल तथा स्कुटर ९९, पैदलयात्रु ७१, कार १६, ट्रक १६, बस आठ, साइकल चार र एउटा माइक्रो दुर्घटनामा परेका छन् । उपत्यकामा आर्थिक वर्ष २०७४÷७५ मा १९४ र आर्थिक वर्ष २०७३÷७४ मा १८२ जनाको सवारी दुर्घटनामा परी ज्यान गुमेको थियो । यातायात व्यवस्था विभागका अनुसार हाल देशभर ३३ लाख र काठमाडौँ उपत्यकामा मात्र ९ लाख हाराहारीमा सवारी साधन सञ्चालनमा रहेका छन् ।