अमेरिकामा आप्रवासी विद्यार्थीहरुले विद्यालय छोड्ने सङ्ख्या बढेको सर्भेक्षणको निष्कर्ष
प्रकाशित मिति : मंसिर २५, २०८२ बिहीबार
अमेरिकामा रहेका आप्रवासी विद्यार्थीहरूले विद्यालयहरूमा बढ्दै गएको आप्रवासी विरोधी भावनाका कारण विद्यालय नै छाड्न थालेको देखिएको छ।
एकातिर आप्रवासी विरुद्धको भावना र अर्कोतर्फ इमिग्रेशन एन्ड कस्टम्स इन्फोर्समेन्ट (आइस) का कारण उत्पन्न भएको डरको वातावरण विद्यार्थीहरूले सामना गरिरहेको एक अध्ययनले देखाएको हो।
आप्रवासी विद्यार्थीहरूले आइस का कारबाहीहरूले सार्वजनिक विद्यालयका आप्रवासी परिवारका विद्यार्थीहरूलाई ठूलो असर पारेको नयाँ सर्वेक्षणले देखाएको छ।
क्यालिफोर्निया विश्वविद्यालय, लस एन्जेलस अन्तर्गतको इन्स्टिट्यूट फर डेमोक्रेसी, एजुकेशन एण्ड एक्सेस (आइडीइए) का अनुसन्धानकर्ताहरूले देशभरका ६०० भन्दा बढी हाइस्कुल प्रिन्सिपलहरूसँग “राष्ट्रिय प्रतिनिधित्व हुने” गरी सर्वेक्षण गरेका थिए।
छापा, पक्राउ र डिपोर्टका घटनाहरूले विद्यालयमा पारिरहेको प्रभावबारेमा अध्ययन गरिएको थियो।
रिपोर्टका अनुसार धेरै प्रिन्सिपलहरूले विद्यालयमा “दुखद र तनावपूर्ण वातावरण” बनेको बताएका छन्। ७०.४ प्रतिशत प्रिन्सिपलहरूले आप्रवासी परिवारका विद्यार्थीहरूले आफू तथा आफ्नो परिवारको सुरक्षाबारे चिन्ता व्यक्त गरेको बताए।
साथै, ५७.८ प्रतिशत प्रिन्सिपलहरूले विद्यालय वर्षकै बीचमा धेरै आप्रवासी अभिभावक तथा अभिभावकहरू समुदाय छाडेर हिँडेको बताए।
केही प्रिन्सिपलहरू त “आप्रवासी परिवारका आफ्ना केही विद्यार्थीहरू कहाँ गए भन्ने सम्म थाहा नभएको” बताउँछन्।
६३.८ प्रतिशत प्रिन्सिपलहरूले विद्यार्थीहरूले “आप्रवासीसम्बन्धी नीतिबाट वा राजनीतिक बयानबाजीका कारण” विद्यालय छाडेको उल्लेख गरेका छन्।
विद्यालयमै बढ्दै गएको आप्रवासीविरोधी वातावरणबाट पनि विद्यार्थीहरू पीडित भएको रिपोर्टमा उल्लेख छ।
मिनेसोटाका एकजना प्रिन्सिपलले भने: “श्वेत विद्यार्थीहरूले हिस्पानिक विद्यार्थीहरूलाई ‘तिम्रो कागज–पत्र देखाउ’ भनेर जिस्क्याउने सङ्ख्यामा वृद्धि भएको देखिएको छ।”
सर्वेक्षणले देशभरका अधिकांश विद्यालयहरूले आप्रवासी विद्यार्थीको आवश्यकता पूरा गर्न “आफ्नो भरपुर प्रयास” गरिरहेको देखाएको छ।
७७.६ प्रतिशत प्रिन्सिपलहरूले सम्भावित फेडरल एजेन्सीको छापा आउने स्थिति सम्हाल्न “विद्यालय स्तरको योजना” बनाएको बताए।
करिब आधा विद्यालयहरूले विद्यार्थीका अभिभावक गिरफ्तारी वा निर्वासनमा परेमा सञ्चालन गर्ने योजनासमेत बनाइसकेका छन्।
रिपोर्ट प्रकाशित भएपछि, डिपार्टमेन्ट अफ होमल्याण्ड सेक्युरिटी (डीएचएस) की प्रवक्ता ट्रिसिया म्याकलफलिनले सर्भेक्षणलाई “लज्जास्पद डर फैलाउने काम गरेको” आरोप लगाइन्।
उनले “विद्यार्थीहरूलाई धम्की आएको वा उपस्थित नहुने जिम्मा आइस मा थोपर्नु गलत हो,” भनेकी छिन्।