राष्ट्रपति भण्डारी न्युयोर्कमा
प्रकाशित मिति : फाल्गुन २७, २०७५ सोमबार
राष्ट्रपति विद्यादेवी भण्डारी न्युयोर्क आउनुभएको छ । सोमबार विहान जोन अफ केनेडी विमानस्थलमा स्वागत गर्न राष्ट्रसंघका लागि नेपाल मिसनका प्रमुख अमृत राई र अमेरिकाका लागि नेपाली राजदूत अर्जुन कार्की लगायत पुग्नुभएको थियो ।
महिलाको स्थितिसम्बन्धी संयुक्त राष्ट्रसंघीय आयोग सीएसडब्लूको ६३औं बैठकमा भाग लिन राष्ट्रपति भण्डारी न्युयोर्क आउनुभएको हो । लैंगिक समानता तथा महिला सशक्तीकरण प्रवद्र्धनमा केन्द्रित अन्तर्राष्ट्रिय स्तरको प्रमुख अन्तरसरकारी उक्त निकायको शक्तिमा नारी विषयक उच्चस्तरीय बैठकमा राष्ट्रपति भण्डारी सहभागी हुने कार्यक्रम छ ।
राष्ट्रपति भण्डारीले महिलाको नेतृत्वले कसरी विश्वलाई परिवर्तन गर्नसक्छ भन्ने विषयमा धारणा राख्ने जनाइएको छ । साइडलानमा भण्डारीले संयुक्त राष्ट्रसंघका महासविच गुटेरसलगायत अन्य सहभागीसँग भेटघाट गर्ने कार्यक्रम छ ।
राष्ट्रपति भण्डारीसँग परराष्ट्र सचिव शंकरदास बैरागी र अन्य अधिकारी न्युयोर्क आउनुभएको छ । राष्ट्रपतिको टोली शुक्रबार नेपाल फर्कने कार्यक्रम छ ।
तस्वीरमा राष्ट्रपति भण्डारीसँगै अमेरिकाका लागि नेपाली राजदूत अर्जुन कार्की, राष्ट्रसंघका लागि न्युयोर्क स्थीत नेपाल मिसनका प्रमुख अमृत राई र अवैतनिक महावाणिज्यदूत ऋषि ढकाल ।