सभामुखको हुकुमी शैली नसच्चिए सदन चल्न दिदैनौँ : कांग्रेस
प्रकाशित मिति : पुस २२, २०७५ आईतबार
प्रमुख प्रतिपक्ष दल नेपाली काँग्रेसले प्रधानमन्त्री केपी शर्मा ओलीले आईतबार संघीय संसदको प्रतिनिधिसभा बैठकमा दिएको वक्तव्यमाथि प्रश्न गर्न नदिएसम्म सदनको कार्वाही अघि बढन नदिने चेतावनी दिएका छ |
काँग्रेसका सांसद गगनकुमार थापाले प्रधानमन्त्री ओलीलाई सदनमा सम्बोधन गर्न दिने तर विपक्षलाई प्रश्न गर्न नदिने सभामुख कृष्णबहादुर महराको एक पक्षीय व्यवहार नसच्चिएसम्म सदनको कार्वाही अघि बढन नदिने चेतावनी दिएका हुन्।
प्रधानमन्त्री ओलीको वक्तव्य सकिएलगत्तै नेपाली काँग्रेसका सांसदहरुले प्रश्न गर्न अनुमति दिन माग गरेका थिए।
तर सभामुख महराले अनुमति नदिएको भन्दै काँग्रेस सांसदहरुले रोष्टम अघि उभिएर नाराबाजी गरेपछि प्रतिनिधिसभा बैठक १५ मिनेटका लागि स्थगित गरिएको थियो।
सदन स्थगित गएपछि संघीय संसद भवन परिसरमा संचारकर्मीसँग संक्षिप्त प्रतिक्रिया दिँदै काँग्रेस सांसद थापाले सभामुख महराले हुकुमी शैलीमा सदन चलाउन खोजेको भन्दै आक्रोश व्यक्त गरे।
प्रधानमन्त्री ओलीले तथ्यांक नै तोडमोड हुने गरी वक्तव्य दिएको उल्लेख गर्दै उनले सो सम्बन्धमा प्रश्न गर्न खोज्दा सभामुखले सरकारको बचाऊ गरेको आरोप लगाए।
यसैगरी सांसद डाक्टर मिनेन्द्र रिजालले सभामुख संसदप्रति जिम्मेवारी नदेखिएको टिप्पणी गरेका छन्। कांग्रेस सांसदहरुले प्रधानमन्त्री ओलीसँग प्रश्नका लागि सभामुख कृष्णबहादुर महरासँग समय माग गरेका थिए। तर सभामुख महराले समय दिन इन्कार गरे।
सांसद रिजालले प्रधानमन्त्री ओलीले संसद छल्ने प्रयास गरेको र त्यसमा सभामुखले साथ दिएको आरोपसमेत लगाए‘प्रधानमन्त्रीले संसद छल्ने प्रयास लोकतन्त्र विरोधी हो।
संसदमा उठेको प्रश्नको जवाफ नदिने हो भने बालुवाटारमा सम्बोधन गरे भैुगो नि, टिभीमा अन्तर्वार्ता दिए भइगो नि संसदमा किन बोल्नु पर्यो,’ रिजालको प्रश्न थियो।
सभामुखले हुकुमी शैलीमा सदनमा प्रधानमन्त्रीको वक्तव्यमाथि प्रश्न गर्न नदिएको सांसद थापाको आरोप छ। यसैबीच प्रतिनिधिसभाको बैठक आगामी बुधबारसम्मका लागि स्थगित गरिएको छ।