न्युयोर्कमा आइसको छापाविरुद्ध सिटी काउन्सिल र संघीय संसदमा छुट्टा छुट्टै बिल
प्रकाशित मिति : मंसिर २३, २०८२ मंगलबार
अमेरिकी आप्रवासन तथा भन्सार प्रवर्तन आइसको एक विभाग इन्फोर्समेन्ट एण्ड रिमुभल अपरेशनका एक अधिकारी । तस्बिर: जोश डेनमार्क/ होमल्याण्ड सेक्युरिटी
न्यूयोर्कमा युएस इमिग्रेशन एण्ड कस्टम्स इन्फोर्समेन्ट (आइस) का छापाहरूको विरोधस्वरूप सिटी काउन्सिल र संघीय संसदमा छुट्टाछुट्टै विधेयक ल्याइने भएका छन्। यी विधेयकहरूले अध्यागमन छापाको विरोध गर्ने र आप्रवासीहरूको सुरक्षालाई समर्थन गर्ने बताइएको छ।
सोमबार म्यानहट्टनस्थित अध्यागमन अदालतमा पुगेका सांसद र सिटी काउन्सिलका सदस्यहरूले न्यूयोर्कवासीहरूलाई भूमिगत हुन बाध्य पारिएको भन्दै प्रस्तावित संघीय र स्थानीय कानुनले यस्तो अवस्थालाई रोक्ने बताएका थिए। न्यूयोर्क सिटीबाट अमेरिकी प्रतिनिधिसभामा प्रतिनिधित्व गर्ने तीन सांसद ड्यान गोल्डम्यान, एड्रियानो एस्पेलाट र नादिया भेलाज्क्वेजले आफ्नो विधेयक आइस अधिकारीहरूलाई आप्रवासीहरूलाई उत्पीडन र कैद गर्नबाट रोक्न रहेको बताए।
त्यस्तै, सिटी काउन्सिल सदस्य एलेक्सा एभिलेसले आप्रवासीहरू बिना न्यूयोर्क सहरको अस्तित्व नै अपूर्ण हुने उल्लेख गर्दै सहरलाई विभाजन गर्ने प्रयासका विरुद्ध सामुदायिक सम्बन्ध र एकतालाई बलियो बनाउन जारी राख्ने बताइन्। सिटी काउन्सिल सदस्यहरूले प्रस्ताव गरेका कानुनहरूले आइसलाई सहरभित्र कारबाही सञ्चालन गर्न अझ कठिन बनाउने र आप्रवासीहरूलाई आफ्नो अधिकारको सम्झना गराउने बताइएको छ। साथै अधिकार उल्लंघन भएमा उनीहरूलाई कानुनी मुद्दा हाल्ने बाटो पनि प्रदान गर्ने व्यवस्था हुने जनाइएको छ।
हाल सयौँ मानिस हिरासतमा परेका र सुनुवाइमा आउन डराएका कारण अन्तर्वार्तामा उपस्थित हुनेहरूको संख्या उल्लेखनीय रूपमा घटेको छ। विधेयक पारित भएमा आइसलाई न्यूयोर्क सहरभित्र कार्य सञ्चालनमा कठिनाइ हुनेछ। नयाँ विधेयकले अदालतमा उपस्थित हुने वा नियमित जाँचका लागि आउने जोकोहीलाई पक्राउ गर्न रोक्ने व्यवस्था गर्नेछ।
सांसदहरूले पेस गरेको विधेयक पारित भएमा आइसको सक्रियता घट्ने विश्वास गरिएको छ। विशेषगरी अदालत परिसरमा गिरफ्तारी निषेध हुने व्यवस्थाले आप्रवासीहरूलाई ठूलो राहत मिल्ने अपेक्षा गरिएको छ। यसले स्थानीय प्रहरीको सहयोगबिना आइसलाई छापा मार्ने तथा थप गतिविधि सञ्चालन गर्न निरुत्साहित गर्न सहायक हुने बताइन्छ।
तर नियमित अदालतमा उपस्थित हुने जोकोहीको गिरफ्तारी रोक्न प्रस्ताव गरिएको संघीय विधेयक पारित हुने सम्भावना निकै कम रहेको देखिन्छ, किनभने यस्तो विधेयकलाई कुनै रिपब्लिकन सांसदले समर्थन गर्ने सम्भावना न्यून छ। तर सिटी काउन्सिलले प्रस्ताव गरेको विधेयक भने पारित हुने राम्रो सम्भावना रहेको बताइन्छ, किनभने नव निर्वाचित मेयरले समेत यस प्रकारका देशनिकाला र आइसका कारबाहीविरुद्ध लड्ने प्रतिबद्धता जनाएका छन्।