तोकिएको समयभन्दा अगाडि बन्ने भो गौतम बुद्ध अन्तर्राष्ट्रिय विमानस्थल, जेठपछि अन्तर्राष्ट्रिय उडान
प्रकाशित मिति : मंसिर २९, २०७५ शनिबार
गौतम बुद्ध अन्तर्राष्ट्रिय विमानस्थलको निर्माण कार्य तोकिएको समयभन्दा अगाडि नै पूरा हुने भएको छ । निर्माणको काम तीव्र गतिमा अघि बढेको र तोकेको समयभन्दा अगाडि नै पूरा हुने जनाइएको छ । छ । आयोजनाका अनुशार विमानस्थलको ५८ प्रतिशत काम पूरा भइसकेको छ ।
धावनमार्गको पहिलो तहमा कालोपत्रे भइरहेको छ भने चार तहपछि धावनमार्ग तयार हुने जनाइएको छ । पहिलो तह सम्पन्न गर्नका लागि १५ देखि १८ दिन लाग्ने र ५० प्रतिशत काम सम्पन्न भइसकेको छ । धावनमार्ग तीन हजार मिटरको छ । मौसमका कारण बाधा उत्पन्न नभए झन्डै दुई महिनामा धावनमार्ग सम्पन्न हुने जनाइएको छ ।
कुनै बाधा अवरोध नआए जेठ महिनासम्म गौतम बुद्ध अन्तर्राष्ट्रिय विमानस्थलबाट अन्तर्राष्ट्रिय विमानहरूले उडान भर्ने जनाइएको छ । विमानस्थलको निर्माण सम्पन्न गर्न २०१९ जुन २८ तारिखसम्म म्याद छ । तर पाँच महिनाभित्रै मुख्य संरचना निर्माण गरेर आंशिक रूपमा विमानस्थल सञ्चालनमा ल्याउने आयोजनाको लक्ष्य छ । आंशिक रूपमा विमानस्थल सञ्चालनमा आए पनि अन्तर्राष्ट्रिय उडान हुनेछ । म्यादभित्रै ९५ प्रतिशतभन्दा बढी काम सम्पन्न हुने आयोजनाले बताएको छ ।
विमानस्थलको विमानपार्कस्थलको काम पूर्णरूपमा सम्पन्न भइसकेको छ भने विमानस्थलको टर्मिनल भवन, प्रशासनिक भवन, कन्ट्रोल टावर, फायर फाइटिङ, टयासी वे लगायतका काम भइरहेका छन् । टर्मिनल भवनको संचरना निर्माण गर्ने करिब पूरा भइसकेको छ ।