पुस १ देखि टुँडिखेल आसपासमा गाडी रोक्न नपाइने
प्रकाशित मिति : मंसिर १८, २०७५ मंगलबार
पुस १ गतेदेखि काठमाडौंको टुँडिखेल आसपास क्षेत्रमा सार्वजनिक सवारी रोक्न नपाइने भएको छ । यस्ता सवारी साधनले यात्रु पर्खेर बस्दा ट्राफिक जाम भएकाले उक्त मितिदेखि काठमाडौं महानगरपालिकाले यो नियम लागु गर्न लागेको जनाएको छ ।
“सो क्षेत्रमा सवारी साधनले यात्रु चढाउँदा र ओराल्दा सयौं मानिसको समय बर्बाद हुने गरेको छ,” मङ्गलबार राष्ट्रिय सभागृहमा आयाजित बैठकमा सडक र सहरसम्वद्ध निकायका प्रतिनिधिसँग काठमाडौं महानगरपालिकाका मेयर विद्यासुन्दर शाक्यले भने, “ट्राफिक जामले कर्मचारी, विद्यार्थीदेखि व्यापारी, व्यवसायी सबैको समय बर्बाद भइरहेको छ । जाममा लामो समय सवारी रोक्दा इन्धन खपत नष्ट हुनुका साथै यस्ता सवारीले धुवाँको प्रदुषण पनि बढाएका छन् ।”
उक्त कार्यक्रममा मेयर शाक्यले चाँडै नै यातायात व्यवसायीसँगै यातायात व्यवस्था विभाग र ट्राफिक प्रहरीको सहकार्यमा पुस १ बाट यात्रु “पिक एण्ड ड्रप” नियम लागु गर्ने घोषणा गरे ।
बैठकमा महानगरपालिकाका प्रमुख प्रशाशकीय अधिकृत यादवप्रसाद कोइरालाले महानगरपालिकाले लागु गर्ने यो नियमलाई यातायात व्यवसायी साथै सम्पूर्ण निकाय र नागरिक मिलेर कार्यान्वयन गर्नुपर्ने बताए ।
महानगरीय प्रहरी कार्यालय रानीपोखरीका प्रहरी नायव महानिरीक्षक शैलेश थापाले पूर्वाधार तयार भएपछि नियम कार्यान्वयन सहज हुने बताए । यस्तै महानगरीय ट्राफिक प्रहरी महाशाखाका एसएसपी वसन्त पन्तले पनि यो नियम कार्यान्वयन गर्ने प्रतिवद्धता व्यक्त गरे ।