अष्ट्रेलियाको मेबलर्नमा नेपाली जेष्ठ नागरिकको अधिवेशन सम्पन्न, नयाँ अध्यक्षमा डा. सुभद्र झा चयन
प्रकाशित मिति : आश्विन १७, २०७५ बुधबार
अष्ट्रेलियामा रहेका नेपालीहरुले आफ्नो समुदायलाई अगाडी बढाउनको लागि र आवश्यक पर्दा एक-अर्कालाई सहयोग गर्नको लागि
विभिन्न संघ संस्था तथा समूह गठन गरेर अगाडी बढिरहेका छन् । मेलबर्नमा रहेका जेष्ठ नागरिकहरुले समुदायको एकता, नेपाली कला संस्कृतिको संरक्षण, नयाँ पुस्तालाई मार्गदर्शन आदिको उद्देश्यले नेपाली सिनियर सिटिजन सोसाइटीको स्थापना गरेका छन् ।
नेपाली सिनियर सिटिजन सोसाईटीले आइतबार साधारणसभा सम्पन्न गरेको छ । उक्त साधारणसभामा सोसाइटीको नयाँ कार्यसमिति पनि चयन भएको छ । नयाँ कार्यसमितिमा अध्यक्ष पदमा डा. सुभद झा चयन भएका छन् । त्यस्तै, नयाँ कार्यसमितिको उपाध्यक्षमा मोहन राई, सचिवमा सुजाता श्रेष्ठ, सहसचिवमा राज श्रेष्ठ, कोषाध्यक्षमा पृथ्वी राई, सहकोषाध्यक्षमा रीता पन्त, सदस्यहरुमा बलबहादुर बुढाथोकी, कृष्ण अधिकारी, डा. दिपकराज पन्त, भरनशमशेर राई चयन भएका छन् । सोसाइटीको सांस्कृतिक सयोजकमा वर्षा केसी राजभण्डारी, परियोजना अधिकृतमा सञ्जय राई, पब्लिक रिलेशन अफिसरमा बम योञ्जनलाई चयन गरिएको छ ।
संस्थाले आमाको मुख हेर्ने दिन, बुवाको मुख हेर्ने दिन जस्ता विशेष दिनहरुमा विशेष कार्यक्रमको आयोजना गरेका थियो । सामाजिक अगुवाहरुले प्रवासमा यसरी जेष्ठ नागरिकहरु भेला भएर आफ्नो अनुभव आदान प्रदान गर्ने कार्य निकै सराहनीय रहेको बताएका छन् ।