असोज ५ देखि दसैंमा घर जानेहरूले अग्रिम टिकट बुक गर्न सक्नुहुनेछ। जानकारीको लागी सेयर गरौँ
प्रकाशित मिति : आश्विन १, २०७५ सोमबार
यस वर्षको दसैंका लागि असोज ५ गतेदेखि बसको अग्रिम टिकट बुकिङ खुला हुने भएको छ । यातायात व्यवस्था विभाग र व्यवसायीबीच आइतबार भएको छलफलपछि अग्रिम टिकट बुकिङ खुला गरिने भएको हो ।
दसैंको आडमा भाडा वृद्धि गर्ने र सिन्डिकेटको काम फर्काउने दाउमा विभिन्न सर्त राखेका व्यवसायीले अन्ततः बुकिङ खुला गर्न सहमत भएका हुन् । यातायात व्यवस्था विभागले सरकारले बन्द गरेका समितिका बैङ्क खाता खुलाउन गृह, भौतिक पूर्वाधार तथा यातायात व्यवस्था मन्त्रालयलगागयतका सरोकारवाला निकायलाई पत्रसहित पहल गर्ने बताएपछि व्यवयायीहरू सहमत भएका हुन् । बन्द रहेका २५४ वटा यातायात समितिका खाता खोल्न विभागले पहल गर्ने सहमति भएको छ । भाडा समायोजनको सवालमा भने कुरै नभएको विभागले जनाएको छ तर असोज ५ गतेसम्म व्यवसायीहरूले राखेका सर्तहरू भने पूरा गर्नुपर्ने बताइएको छ । भाडा समायोजन र बैङ्क खाता खुला गर्नुपर्ने माग व्यवसायीहरूको छ ।
नेपाल यातायात व्यवसायी राष्ट्रिय महासङ्घका महासचिव सरोज सिटौलाले भन्नुभयो ‘असोज ५ गतेबाट अग्रिम टिकट खुला गर्ने सहमति भएको छ, त्यसका लागि हामी तयार छौँ, भाडा समायोजन र खाता खोल्ने जिम्मेवारी हामीले सरकारलाई दिएका छौँ, हेरौँ सरकारले के गर्छ, हाम्रा कुरा हामीले सरकारलाई भनेका छौँ । ’
मन्त्रालयहरूलाई चिठी पठाएर ५ गतेसम्म समितिहरूको बैङ्क खाता खुलाउन पहल गर्ने सहमति भएको विभागका प्रवक्ता गोकर्णप्रसाद उपाध्यायले जानकारी दिनुभयो । व्यवसायीहरूले भाडा समायोजना र बैङ्क खाता खुला गर्न दबाब दिँदै आएका छन् ।
सिन्डिकेट अन्त्य गर्न पञ्जीकरणको व्यवस्थासहित नयाँ निर्देशिका लागू गरी यातायात समितिहरूलाई सरकारले कारबाही गरेको छ । समितिका बैङ्क खाता रोक्का गरेको छ ।गत वैशाखदेखि समितिहरूको खाता सरकारले बन्द गरेपछि खातामा रहेको पैसा के गर्ने भन्ने सवालमा यातायात मन्त्रालयले समिति बनाएर काम गरेको थियो । समितिले सुझावसहितको प्रतिवेन पनि बुझाएको छ तर सरकारले समितिको खाताको रकम के गर्ने भन्ने सवालमा कुनै निर्णय गरेको छैन ।खाता रोक्का गरे पनि व्यवसायीहरूले आफूहरू समस्यामा परेको बताउँदै आएका छन् । कर्मचारीको तलब, कार्यालय भाडा, घाइतेको उपचार तथा मृतकका परिवारलाई क्षतिपूर्ति दिन नसकिएको नेपाल यातायात राष्ट्रिय व्यवसायी महासङ्घले जनाएको छ ।
बर्सेनि महँगी बढेको र सरकारले कर बढाएको अवस्थामा भाडा समायोजनको विकल्प नभएको व्यवसायीहरूको भनाइ छ । सिटौलाले भन्नुभयो ‘बैङ्क ब्याजदर बढेको छ, कर बढेको छ, १२÷१३ पटक इन्धनको भाउ बढिसक्यो ११ वर्षदेखि भाडा समायोजन भएको छैन, करोड पर्ने बसहरू आइसके, पाटपुर्जाको भाउ बर्सेनि बढ्छ यी कुराहरू हामीले राखेका छौँ । ’सिन्डिकेटको अन्त्य गर्न पञ्जीकरण गर्नुपर्ने नयाँ निर्देशिका लागू भए पनि व्यवसायीहरूले अझै आनाकानी गरिरहेका छन् । हालसम्म जम्मा ३५ सय सवारी साधान पञ्जीकरण भएका छन् । नेपालमा ९५ हजार सार्वजनिक सवारी साधन छन् । दसैंका अवसरमा काठमाडौँबाट लामो दूरीमा चल्ने बसहरूमा एक महिना पहिल्यै टिकट लिनुपर्ने बाध्यता छ । करिब २५ लाखभन्दा बढी यात्रु दसैंमा काठमाडौँ बाहिर जान्छन् ।