पाँच अमेरिकी भेनेजुएलामा पक्राउ, ह्वाइट हाउसले कारण खोज्दै
प्रकाशित मिति : १७ पुस २०८२, बिहिबार
भेनेजुएलाको सुरक्षा बलले कम्तीमा पाँच जना अमेरिकी नागरिकलाई पक्राउ गरेको अमेरिकी अधिकारीहरूले जानकारी दिएका छन्। यो घटना अमेरिकाले भेनेजुएलाका राष्ट्रपति निकोलास मादुरोविरुद्ध दबाब अभियान तीव्र बनाइरहेको समयमा भएको हो।
पक्राउ परेका अमेरिकीहरूमध्ये केही लागुऔषध तस्करीमा संलग्न भएको हुन सक्ने आशङ्का अधिकारीहरूले व्यक्त गरेका छन्।
उनीहरू भेनेजुएलामा के गर्दै थिए र पक्राउ पर्दाको अवस्था कस्तो थियो भन्नेबारे अमेरिकी अधिकारीहरूले थप जानकारी सङ्कलन गरिरहेका छन्।
ट्रम्प प्रशासनका अनुसार मादुरो शासनले अमेरिकामाथि दबाब सिर्जना गर्न यी नागरिकहरूलाई ‘बार्गेनिङ चिप’ का रूपमा प्रयोग गर्न खोजिरहेको छ।
पछिल्ला महिनाहरूमा अमेरिकाले लागुऔषध ओसारपसार गर्ने डुङ्गाहरूमाथि कारबाही, सीआईए मार्फत ड्रोन आक्रमण र तेलमा नाकाबन्दी जस्ता कडा कदम चालेको छ।
यो रणनीति रुसको कार्यशैलीसँग मिल्दोजुल्दो देखिएको छ, जसले अमेरिकासँगको तनावपूर्ण सम्बन्धमा दबाब दिन अमेरिकी नागरिकहरूलाई पक्राउ गर्ने गर्दछ। अमेरिकी विदेश मन्त्रालय र ह्वाइट हाउसले यसबारे हालसम्म कुनै आधिकारिक प्रतिक्रिया दिएका छैनन्।
ट्रम्प प्रशासनले भेनेजुएलामा प्रत्यक्ष रूपमा शासन परिवर्तन गर्न खोजिरहेको देखिन्छ। अमेरिकाले मादुरोलाई ‘अवैध नेता’ र ‘लागुऔषध तस्कर’ को आरोप लगाउँदै आएको छ।
गत डिसेम्बरमा अमेरिकी विदेश मन्त्रालयले मादुरोका तीन भतिजा र साली लगायत परिवारका सदस्यहरूमाथि दुई चरणमा प्रतिबन्ध लगाएको थियो।
सोही महिना अमेरिकाले पहिलो पटक भेनेजुएलाको स्थलगत लक्ष्यमा सीआईए ड्रोनमार्फत आक्रमण गरी एक बन्दरगाह केन्द्र नष्ट गरेको थियो।
मानवअधिकारकर्मीहरूका अनुसार भेनेजुएलामा सयौँ व्यक्तिहरू राजनीतिक बन्दीका रूपमा थुनिएका छन्, जसमा सन् २०२४ को चुनावपछि पक्राउ परेका व्यक्तिहरू पनि सामेल छन्।
भेनेजुएलाको एक जेलबाट बिहीबार दर्जनौँ मानिस रिहा गरिए पनि, ‘फोरो पेनल’ नामक अधिकार समूहका प्रमुख अल्फ्रेडो रोमेरोका अनुसार तीमध्ये कोही पनि अमेरिकी नागरिक छैनन्।