जापानको होक्काइदोमा शक्तिशाली भुकम्पमा परि २ जनाको मृत्यू, ४० सम्पर्कविहिन
प्रकाशित मिति : भाद्र २१, २०७५ बिहीबार
विहिवार विहानै जापानको होक्काइदोमा प्रारम्भिक ६ दशमलव ७ म्याग्नेच्यूड मापन गरिएको भुकम्प गएको छ । एनएचकेले दिएको पछिल्लो समाचारअनुसार २ जनाको मृत्यू भएको निश्चित भएको छ भने ४० जना हराइरहेका छन् । १२० जना घाइते रहेको समाचारमा उल्लेख छ । भुकम्पका कारण विद्युत प्रवाह ठप्प छ भने यातायातहरु रोकिएको साथै भुकम्पपश्चातको पहिरोमा परि घरहरु पुरिएको अधिकारीहरुले बताएका छन् । भुकम्पपश्चात ठूलो पराकम्प पनि गएको थियो ।
विहानै ३ बजेर ८ मिनेट जाँदा गएको भुकम्पका कारण पहिरो जाँदा धेरै घरहरु पुरिएक छन् । हजारौंको संख्यामा उद्धारकर्मीहरु परिचालन गरिएको स्थानीय सरकाले जनाएको छ । पहिरो गएका ठाउँहरुबाट हेलिकप्टरमार्फत उद्धार गर्ने काम जारी रहेको छ ।
भुकम्पका कारण होक्काइदो इलेक्ट्रिक पावर कम्पनीको सहयाक उर्जा श्रोतसंगको सम्बन्ध विच्छेद हुँदा विद्युत प्रवाह बन्द भएको छ । त्यहाँका ३० लाख घरहरुमा विद्युत सुचारु हुन सकेको छैन भने साप्पोरो क्षेत्रमा टेलिफोन तथा टेलिभिजन समेत नचलेको बताइएको छ ।
त्यहाँ रहेका परमाणु प्लान्टहरुमा विकिरण स्तरमा कुनै असामान्य गतिविधि नभेटिएकाले विकिरण प्रवाहको कुनै खतरा नरहेको बताइएको छ ।
दक्षिणी होक्काइदोको लगभग ३७ किलोमिटरको गहिराईमा जापानी भूकम्प तीव्रता स्तर मापन अनुसार ७ मापन गरिएको भुकम्प सन् १९९६ यताकै ठूलो हो । भुकम्पका कारण सुनामीको खतरा भने छैन ।
न्यू चितोसे एअरपोर्टको एक भागमा सिलिङ भत्किएको र विद्युत प्रवाह पनि रोकिएका कारण आज दिनभर बन्द रहने यातायात मन्त्रालयले जनाएको छ ।
बुलेट ट्रेन तथा स्थानीय रेल सेवाहरु पनि अवरुद्ध रहेका छन् । सार्वजनिक बस तथा हाइवेहरु बन्द गरिएको बताइएको छ । स्कुलहरुसमेत आजका लागि बन्द गरिएको समाचारमा उल्लेख छ ।
धेरै सहरहरुमा अस्थायी आश्रयस्थलहरु तयार पारिसकिएको बताइएको छ ।
प्रधानमन्त्री सिन्जो आवेले सरकारले इमर्जेन्सी कार्यदल तयार गरिएको र खोजी तथा उद्धारको कार्यलाई प्राथमिकतामा राखिएको बताएका छन् ।
