बिरामी महिलालाई बोक्सी लागेको भन्दै पन्यूले डाम्ने पक्राउ
प्रकाशित मिति : असार ८, २०७५ शुक्रबार
बोक्सी भगाउन भन्दै बिरामी महिलालाई तातो पन्यूले डाम्न सहयोग गर्ने ३ जनालाई प्रहरीले पक्राउ गरेको छ ।
रामेछापको लिखु तामाकोसी गाउँपालिका १ की बिरामी महिलालाई बोक्सी लागेको भन्दै पून्यू तताएर गालामा डाम्न सहयोग गर्ने दिपक दर्जी, राजन पौडेल, असिम रोकालाई प्रहरीले पक्राउ गरेको हो । पन्यूले डाम्ने मुख्य व्यक्ति फरार रहेको प्रहरीले जनाएको छ ।
धामी भन्दै पन्युले डाम्ने रविन्द्र नेवार भने फरार रहेको जिल्ला प्रहरी कार्यालय रामेछापका प्रहरी निरीक्षक राजेन्द्रकुमार थापाले बताए ।
बिरामी २६ वर्षीया सरिता दर्जीलाई बोक्सीले दुःख दिएको भन्दै ती युवाले बोक्सी भगाइदिन्छु भनि सिस्नो पानीले हान्ने र तातो फलामले दाहिने गालामा डामेको जिल्ला प्रहरी निरीक्षक थापाले बताए ।
बोक्सी भगाउने भन्दै कुटपिट गरेर घाइते भएकी सरिताले धामीले रोग ठिक पारिदिने भन्दै आफूलाई थप पीडा दिएको भन्दै जिला प्रहरी कार्यालयमा असार ५ गते उजुरी दिएकी थिइन् ।
पक्राउ परेका तिनै जनामाथि अनुसन्धान सुरु गरेको र मुख्य योजनाकारलाई पक्राउ गर्न प्रहरी परिचालन गरेको थापाले बताएका छन् । महिलालाई उपचार गरी घर पठाएको प्रहरीले जनाएको छ ।