साइबर अपराधका घटना बढ्यो
प्रकाशित मिति : जेष्ठ १७, २०७५ बिहीबार
काठमाडौँ उपत्यकामा साइबर अपराधका घटना बढ्दै गएका छन्।
प्रविधिको विकाससँगै सामाजिक सञ्जालमार्फत अपराध गर्नेको संख्या बढ्दै गएको प्रहरीले जनाएको छ। महानगरीय अपराध महाशाखामा चालू आर्थिक वर्षको १० महिनामा एक हजार १७६ साइबर अपराधका घटना दर्ता भएका छन्।
सामाजिक सञ्जाल विशेष गरेर फेसबुक, इमेल, ट्वीटर, युट्युब, एसएमएस, एटीएमलगायतका माध्यमबाट साइबर अपराधका घटना बढेका महानगरीय अपराध महाशाखाका प्रमुख एवं प्रहरी वरिष्ठ उपरीक्षक धीरजप्रताप सिंहले जानकारी दिए।
चालू आवको १० महिनामा अपराधमा संलग्न ५४ जनालाई मुद्दा चलाइएको प्रिहरीले जनाएको छ।
विभिन्न सामाजिक सञ्जालमा ३७, अरु व्यक्तिको पासपार्ट ह्याकिङ गर्ने दुई, नचाहिँदो कुरा लेखेर एसएमएस गरेर धम्की दिने ११, एसएमएस गरेर चिट्टा प¥यो भनेर ठगी गर्ने तीन र युट्युबमा अनावश्यक कुरा राखेर चरित्र हत्या गर्ने दुईजनालाई पक्राउ गरेर मुद्दा चलाइएको सिंहले बताए।
साइबर अपराधमा लाग्नेमध्ये सबैभन्दा धेरै १२ वर्षदेखि ४५ वर्ष उमेर समूहका रहेका प्रहरीले जनाएको छ। चार वर्षको तथ्यांकलाई हेर्दा आव २०७१-०७२ मा ३०५, २०७२-७३ मा ८३० र २०७३-०७४ मा एक हजार १९७ मुद्दा महाशाखामा दर्ता भएका छन्।
पछिल्लो समयमा उपत्यकालगायत देशभर साइबर अपराध बढ्दै गएपछि यही जेठ १५ गते अर्थमन्त्री डा. युवराज खतिवडाले बजेट वक्तव्यमा साइबर अपराध नियन्त्रण ब्यूरो स्थापनाका लागि बजेट विनियोजन गरिएको घोषणा गरेका छन्।