कर्नाटकमा भाजपाको बहुमत पुगेन, तेस्रो दलका नेताद्वारा मुख्यमन्त्रीको दाबी
प्रकाशित मिति : जेष्ठ १, २०७५ मंगलबार
२२४ सिटको कर्नाटक विधानसभामा सबैभन्दा ठूलो दल बनेर पनि भारतीय जनता पार्टीले सरकार बनाउन नपाउने देखिएको छ। भाजपाले सबैभन्दा बढी १०४ सिट जितेको छ।
चुनावको अन्तिम नतिजा नआउँदै जनता दल सेक्युलरले कांग्रेससँग मिलेर सरकार बनाउने घोषणा गरेको छ। कांग्रेसले ७८ सिट हात पार्ने देखिएको छ भने जनता दलले ३८ सिट जित्दैछ।
कांग्रेसले जनता दलका नेता देव गौडाका छोरा कुमारास्वामीलाई मुख्यमन्त्री बनाउन आफू तयार रहेको बताएको छ।
कुमारास्वामीलाई राज्यपाललाई आफ्नो नियुक्तिका लागि पत्र पनि लेखिसकेका छन्।
राज्यपालले अन्तिम नतिजा आएपछि मात्रै निर्णय लिने भएका छन्।
कांग्रेस र जनता दलको सरकार बन्ने चर्चाका बीच भाजपाको जीतको खुसियाली रोकिएको छ। यद्यपि भाजपा नेता यदुयरप्पाले पनि सबैभन्दा ठूलो दलको हैसियतले सरकार निर्माणको मौका पहिले आफूहरुले पाउनुपर्ने बताएका छन्।
यसअघि कंग्रेसका मुख्यमन्त्री सिद्धारमैयाले राजीनामा बुझाएका छन्। एजेन्सी