पासाङल्हामु राजमार्ग सुधारले गति लियो
प्रकाशित मिति : बैशाख २८, २०७५ शुक्रबार
पासाङल्हामु राजमार्ग सुधार कार्यलाई तीव्रता दिइएको छ । वर्षा सुरु हुनु अघि नै निर्माण कार्य सम्पन्न गर्नका लागि कामलाई तीव्रता दिइएको हो ।
राजमार्गको रसुवाखण्डको बेत्रावतीदेखि स्याफ्रुसम्मको सडकखण्डमा खाल्डाखुल्डी पुर्ने, ढलान गर्ने, कज्वे मर्मत गर्ने, नाला मर्मत गर्ने, पिच गर्ने र साँघुरो सडकलाई चौडा बनाउने कार्य भइरहेको डिभिजन सडक कार्यालय नुवाकोटले जानकारी दिएको छ ।
गएको वर्ष बजेट ढिलो आउँदा सडक मर्मत तथा सुधारको कार्य प्रभावित भएको थियो । यो वर्ष समयमा नै बजेट आएको र मौसमले साथ दिएमा काम सम्पन्न हुने डिभिजन प्रमुख निरज शाक्यले बताउनुभयो ।
असारभित्रै कार्य सम्पन्न गर्नेगरि सडक सुधार तथा मर्मत कार्यलाई तीव्रता दिइएको उहाँको भनाई छ । ‘हामीले यो वर्षका लागि बनाएको योजना अनुसार काम गरिरहेका छौँ, डिभिजन प्रमुख शाक्यले भन्नुभयो, यहि गतिमा काम हुन सकेमा निर्माण सम्पन्न हुनेमा ढुक्क हुन सकिन्छ ।’
२०७१ सालमा भत्किएको सोलेमा रहेको कज्वेको पुनर्निर्माण यो वर्ष सुरु गरिएको छ । कज्वेको पुनर्निर्माण हुन नसक्दा चालक, सहचालक तथा यात्रुले जोखिमपूर्ण यात्रा गर्न बाध्य थिए । चीनसँगको अन्तर्राष्ट्रिय व्यापारिक नाका रसुवागढी जोड्ने सडक भए पनि समयमा काम नहुँदा यात्रुले सास्ती खेप्दै आएका थिए ।
पहिरो गएको क्षेत्रमा सोलिङ गर्ने र खाल्डाखुल्डी पुर्ने काम अन्तिम चरणमा पुगेको कार्यालयले जनाएको छ ।
सडक मर्मत तथा सुधारका लागि ६ करोड १५ लाख बजेट :
पासाङल्हामु राजमार्ग सुधारका लागि ६ करोड १५ लाख वजेट रहेको डिभिजन सडक कार्यालय नुवाकोटले जनाएको छ ।
सडक मर्मत तथा सुधार गर्नका लागि गएको वर्षको बाँकी दुई करोड ८५ लाख र यो वर्षको लागि थप भएर आएको तीन करोड ३० लाख बजेट रहेको डिभिजन प्रमुख शाक्यले बताउनुभयो । गएको वर्ष बजेट ढिलो आउँदा काम हुन नसकेर बजेट फ्रिज हुन पुगेको थियो ।
यो वर्ष बजेट फ्रिज हुन नदिन कार्यालयले कार्यलाई तीव्रता दिएको छ ।
रसुवामा सडकको साइड कार्यालय खोलिने :
अन्तर्राष्ट्रिय नाका रसुवागढी जोड्ने पासाङल्हामु राजमार्गस्थित रसुवाखण्डको प्रत्यक्ष निगरानी गर्नका लागि डिभिजन सडक कार्यालय नुवाकोटले रसुवामा साइड अफिस खोल्ने तयारी गरेको छ ।
राजमार्गमा आउने समस्याको तत्काल समाधान गर्नका जेठको पहिलो हप्तासम्ममा सदरमुकाम धुन्चेमा साइड अफिस खोल्ने तयारी थालिएको हो । वर्षायाममा राजमार्गको रसुवा खण्डमा बढी समस्या आउने गरेको छ ।
वर्षाको समयमा जिल्लाको बेत्रावतीदेखि टिमुरेसम्म आधा दर्जन स्थानमा पहिरोले बाटो अवरुद्ध हुँदै आएको छ । जिल्लामा कार्यालय स्थापना भएपछि कार्य गर्न सहज हुने रसुवाका प्रमुख जिल्ला अधिकारी कृष्ण पौडेलले बताउनुभयो ।
‘सडक डिभिजनको कार्यालय जिल्लामा नहुँदा चालक र यात्रुले निकै सास्ती खेप्नु परेको रहेछ, प्रमुख जिल्ला अधिकारी पौडेलले भन्नुभयो, हामीले जिल्लामा कार्यालय स्थापनाका लागि समन्वय गरिरहेका छौँ ।’
वर्षायाममा नियमित सडक सञ्चालन हुने :
वर्षाको समयमा राजमार्ग नियमित सञ्चालन गर्नका लागि कार्यालयले पूर्वतयारी थालेको छ । जेठदेखि भदौ अन्तिमसम्म नियमित यातायात सञ्चालनका लागि पहिरो गएको स्थानहरु नजिकै एक्साभेटर र लोडर राख्ने तयारी गरिएको छ ।
वर्षाको समयमा राजमार्गको राम्चे, मुलखर्क, खोप्पाङभिर, सानोभार्खु, लिङलिङ, फ्याङ्लुङ र घट्टेखोला क्षेत्रमा पहिरोले सडक अवरुद्ध हुने गरेको छ । जिल्लाको राम्चेदेखि स्याफ्रुसम्म कार्यालयले र स्याफ्रुभन्दा माथिको क्षेत्रमा जलविद्युत आयोजनाहरुले स्काभेटर र लोडर राख्ने तयारी गरेका छन् ।
वर्षायाममा सडक बन्द हुन नदिनका लागि हेबी इक्युपमेन्ट डिभिजनसँग आवश्यक सामग्री माग गरिएको डिभिजन प्रमुख शाक्यले बताउनुभयो । ट्रक, स्काभेटर र लोडर गरी ६ वटा सामग्री माग गरिएको उहाँले जानकारी दिनुभयो ।
‘पासाङल्हामु राजमार्गमा नियमित सडक सुचारु गर्नका लागि डिभिजनसँग आवश्यक सामग्री माग गरेका छौँ, उहाँले भन्नुभयो, वर्षा अघि नै ती सामग्री सम्बन्धित स्थानमा पुर्याउँछौँ ।’