लोकमान कुन लोकको यमराज हुन् र कानून नलाग्ने ?
प्रकाशित मिति : कार्तिक २, २०७३ मंगलबार
अख्तियार दुरुपयोग अनुसन्धान आयोगका प्रमुख आयुक्त लोकमानसिंह कार्कीको घरमा सर्वोच्च अदालतले म्याद तामेली गर्न नसक्ने अवस्था सिर्जना हुनु कानूनी शासनमाथिको प्रहार भएको भन्दै सांसदहरूले सदनमा ध्यानाकर्षण गराएका छन् ।
व्यवस्थापिका संसदको मंगलवार बसेको बैठकको विशेष समयमा सांसदहरूले सर्वोच्च अदालतले म्याद तामेली गर्न नसक्ने अबस्था आउनु दुर्भाग्य भएको बताएका हुन् । विशेष समयमा नेपाली कांग्रेसका राधेश्याम अधिकारीले संवैधानिक निकायको प्रमुखले कानूनको खिल्ली उडाउँदा संसद टुलुटुलु हेरेर बस्न नमिल्ने बताए ।
उनले अख्तियार प्रमुख कार्कीको विदा कहिलेसम्म स्वीकृत भएको भन्नेबारे सदनलाई जानकारी गराउन माग गरे । एमालेका रेवती रमण भण्डारीले लोकमानको घरमा सर्वोच्च अदालतले म्याद तामेली गर्न नसक्ने अवस्थाले देशको शान्ति सुरक्षा कस्तो छ भनी गृहमन्त्रीसँग प्रश्न गरे ।
थरुहट तराई पार्टीकी गंगा चौधरी सत्गौवाले प्रमुख राजनीतिक दलको संरक्षणकै कारण सर्वोच्च अदालतले लोकमानको घरमा म्याद तामेली गर्न नसकेको बताइन् । ‘कानूनको संरक्षण गर्नुपर्ने मान्छेले कानूनको धज्जी उडाउने ? ‘लोकमानसिंह कुन लोकको यमराज हुन्,उनको घरमा म्याद तामेली गर्न नसकिने ?,’ चौधरीले भनिन्, ‘भ्रष्टाचारीलाई देश निकाला गर्नुपर्छ । उनलाई बचाउने राजनीतिक दललाई पनि कानूनको कठघरामा ल्याउनुपर्छ ।’