Follow @khasokhasmag

बिपी राजमार्गमा साना साधनलाई मात्र अनुमति


प्रकाशित मिति : आश्विन १७, २०७३ सोमबार

भौतिक पूर्वाधार तथा यातायात मन्त्रालयले बिपी (बनेपा–बर्दिबास) राजमार्गमा १८ सिटभन्दा कम क्षमताका साना सवारीसाधन मात्र सञ्चालन गर्ने निर्णय गरेको छ । मन्त्रालयले गत साउनमा गठन गरेको सात सदस्यीय प्राविधिक अध्ययन समितिको सिफारिसविपरीत समितिको सिफारिसविपरीत उक्त निर्णय गरेको हो । प्राविधिक अध्ययन समितिले उक्त राजमार्ग ठूला (३५) सिटे सवारीसाधन सञ्चालन गर्नका लागि प्राविधिक रूपमा योग्य रहेको सिफारिस बुझाएको थियो ।

सो राजमार्गमा यातायात सञ्चालन गरिरहेका व्यवसायीको दवाबमा परेर मन्त्रालयले ठूला सवारीसाधन सञ्चालन गर्ने निर्णयबाट पछि हटेको प्राविधिक अध्ययन समितिका एक सदस्यले जानकारी दिए । समितिले ७ असोजमा मन्त्रालयलाई प्रतिवेदन बुझाएको थियो । तर, मन्त्रालय १८ सिटभन्दा कम क्षमताका साना सवारीसाधन मात्र सञ्चालन गर्न दिने निष्कर्षमा पुगेको हो ।

प्राविधिक अध्ययन समितिका एक सदस्यका अनुसार समितिले पाएको करिब दुई महिनाको अवधिमा जापानले निर्माण गरेको उक्त सडकको सबै पक्षको अध्ययन गरिएको छ । ‘ड्रइङ, डिजाइनलगायत सबै पक्षको अध्ययन गरेर नै ठूलो सवारीसाधन पनि सञ्चालन गर्न सकिने निष्कर्षमा समिति पुगेको हो,’ उनले भने ।

यसका साथै चाडपर्वको समयमा पृथ्वी राजमार्गमा ट्राफिक उच्च हुने हुँदा त्यसलाई ‘डाइभर्ट’ गर्न पनि सहज हुने देखेर नै ठूला सवारीसाधनलाई पनि सञ्चालन गर्न सिफारिस गरिएको हो । तर, अहिले कार्यान्वयन गर्ने वेलामा मन्त्रालयले फरक निर्णय गरेपछि समितिका सदस्यले आफैँसँग भएको प्रतिवेदनसमेत सार्वजनिक गर्न इन्कार गरेका छन् ।

त्यस्तै, प्राविधिक समितिले आफ्नो प्रतिवदेनमा ठूला सवारी सञ्चालन गर्दा सडकमा पर्न सक्ने प्रभाव मूल्यांकन गर्न ६ महिनाको परीक्षण अवधि पनि तोकेको नयाँ पत्रिकामा खबर छ । त्यो अवधिमा ठूलो सवारीसाधन सञ्चालन गरेका कारण खतराजनक अवस्था देखापरेमा अहिलेको निर्णय परिवर्तन गर्ने ठाउँ राखिएको छ । मन्त्रालयले आफ्नो निर्णयमा प्राविधिक समितिको प्रतिवेदन प्राप्त भएको र ‘थप विस्तृत अध्ययन’ गरिने उल्लेख गरेको छ ।

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com