अमेरिकामा घरकर्जाको ब्याजदर फेरि ७ प्रतिशत नाघ्ने अर्थशास्त्रीहरूको अनुमान
Photo: Kurt Hänel/ Unsplash
वर्षभरि लगातार बढिरहेको घरकर्जाको ब्याजदर अझै उकालो लाग्ने अर्थशास्त्रीहरूले प्रक्षेपण गरेका छन्। केही विशेषज्ञहरूका अनुसार यो दर पुन: ७ प्रतिशतभन्दा माथि पुग्न सक्छ।
मुडिज एनालिटिक्सका मुख्य अर्थशास्त्री मार्क जान्डीका अनुसार, “हामी लगभग त्यही विन्दुमा पुगिसकेका छौँ र ब्याजदर सजिलै ७ प्रतिशतभन्दा माथि जान सक्छ।”
फ्रेडी म्याक भन्छन् ३० वर्षको स्थिर घरकर्जाको औसत ब्याजदर यस हप्ता बढेर ६.७१ प्रतिशत पुगेको छ। यो पछिल्लो १३ महिनायताकै उच्च हो, जुन फेब्रुअरीको अन्त्यतिर ६ प्रतिशतभन्दा तल थियो।
विशेषज्ञहरूका अनुसार ब्याजदर बढ्नुको मुख्य कारण ऋणपत्र बजारमा आएको उतारचढाव हो। ऊर्जाको मूल्य वृद्धि र अमेरिकी सरकारी ऋणका कारण बढेको मुद्रास्फीतिको चिन्ताले विश्वव्यापी रूपमा ऋणपत्र बिक्रीको लहर चलाएको छ, जसले गृहऋण, अटो लोन र क्रेडिट कार्डको ब्याज बढाएको छ।
गृहऋणको ब्याजदर १० वर्षे ट्रेजरी प्रतिफलसँग प्रत्यक्ष जोडिएको हुन्छ, जुन पछिल्लो छ महिनामा ४.०८ प्रतिशतबाट बढेर ४.७७ प्रतिशत पुगेको छ। दीर्घकालीन ऋणपत्रमा जोखिम बढेको महसुस गर्दै लगानीकर्ताहरूले उच्च प्रतिफलको माग गरिरहेका छन्, जसले घरकर्जाको दरमा माथितिर दबाब सिर्जना गरेको छ।
मुद्रास्फीति अझै पनि केन्द्रीय बैंकको २ प्रतिशतको वार्षिक लक्ष्यभन्दा धेरै माथि रहेकाले, केन्द्रीय बैंकले यसै महिना आफ्नो बेन्चमार्क दर बढाउन सक्ने सम्भावना व्यापारीहरूले देखाएका छन्।
जान्डीका अनुसार, “ऋणपत्र बजार एकदमै संवेदनशील अवस्थामा छ। ब्याजदर अझै बढेर घरकर्जाको दर ७ प्रतिशतभन्दा माथि पुग्न सक्छ।” उनले ब्याजदर घट्न समय लाग्ने भएकाले घरजग्गा बजार केही समय सुस्त नै रहने बताए।
नर्डवालेटकी ऋण विशेषज्ञ केट वुडका अनुसार केही ऋणदाताहरूले अहिल्यै ७ प्रतिशतभन्दा बढी ब्याजदरमा प्रस्ताव गरिरहेका छन्।
रियाल्टर डटकमका वरिष्ठ अर्थशास्त्री जेक क्रिमेलका अनुसार घरकर्जाको लागत केही समयका लागि उच्च नै रहनेछ। उनले ब्याजदर घट्नुको साटो अझै बढ्ने सम्भावना बढी रहेको बताए।
ब्याजदर बढ्दा घर खरिदको लागत उल्लेख्य रूपमा बढे पनि, केट वुड यसलाई एउटा अवसरका रूपमा पनि हेर्छिन्। उनी भन्छिन्, “ब्याजदरका हिसाबले रकम बचत नभए पनि, बजारमा प्रतिस्पर्धा कम हुने भएकाले घरको मूल्यका हिसाबले फाइदा हुन सक्छ।”