ट्रम्पको भाषणको गोप्य सूचना प्रयोग गरी सट्टेबाजी गर्ने ह्वाइट हाउसका पूर्वकर्मचारीलाई २ करोड ३० लाख जरिवाना
Photo: René DeAnda/Unsplash
ह्वाइट हाउसका एक पूर्व टेलिप्रम्प्टर अपरेटरलाई अमेरिकी राष्ट्रपति डोनाल्ड ट्रम्पका भाषणहरूमा भित्री सूचना प्रयोग गरेर सट्टेबाजी गरेको आरोपमा करिब २ करोड ३० लाख नेपाली रुपैयाँ तिर्न आदेश दिइएको छ।
ग्याब्रिएल पेरेजले डिसेम्बर २०२५ देखि फेब्रुअरी २०२६ को बीचमा राष्ट्रपति ट्रम्पले आफ्ना सम्बोधनहरूमा के-के शब्दहरू प्रयोग गर्छन् भन्ने विषयमा ‘काल्शी’ नामको पूर्वअनुमान बजार प्लेटफर्ममार्फत बाजी लगाएका थिए।
अमेरिकाको नियामक निकाय ‘कमोडिटी फ्युचर्स ट्रेडिङ कमिसन’का अनुसार पेरेजले अनुचित तरिकाले कमाएको १०७,५३९.०२ डलर फिर्ता गर्नुपर्नेछ भने ६५,००० डलर नागरिक जरिवाना तिर्नुपर्नेछ।सिएफटीसीले अनुसन्धानमा उत्कृष्ट सहयोग गरेकाले उनको जरिवाना रकम घटाइएको जनाएको छ। यसका साथै उनलाई तीन वर्षसम्म कुनै पनि किसिमको ट्रेडिङ गर्न प्रतिबन्ध लगाइएको छ।
काल्शीका मुख्य वकिल बोबी डिनाल्टले यस निर्णयको स्वागत गर्दै नियम वा सङ्घीय कानून उल्लङ्घन गर्ने जो-कोहीले पनि परिणाम भोग्नुपर्ने बताएका छन्। काल्शीले मार्च महिनामा केही विशेष शब्दहरूको सट्टेबाजीमा शङ्कास्पद गतिविधि देखेको र अनुसन्धान गर्दा उक्त व्यक्ति ह्वाइट हाउसको टेलिप्रम्प्टर अपरेटर रहेको थाहा पाएपछि नियामक निकायलाई जानकारी गराएको थियो।
यस घटनापछि ह्वाइट हाउसको व्यवस्थापन कार्यालयले आफ्ना कर्मचारीहरूलाई पूर्वअनुमान बजारमा सट्टेबाजी नगर्न निर्देशन दिँदै पत्र पठाएको छ।