न्यूयोर्कमा मामदानीको कर योजनालाई अदालतबाट अन्तरिम राहत, थप शुल्क प्रक्रिया पुनः सुरु
Photo: Zoshua Colah/ Unsplash
न्यूयोर्क सहरका डेमोक्र्याटिक मेयर जोहरान मामदानीको बहुचर्चित तथा विवादित विलासी घर कर लागू गर्ने प्रक्रिया पुनः अगाडि बढेको छ। बिहीबार न्यूयोर्कको पुनरावेदन अदालतले तल्लो अदालतले लगाएको अस्थायी रोक हटाइदिएपछि सहर प्रशासनलाई यस प्रक्रियामा अघि बढ्न बाटो खुलेको हो।
न्यायाधीश फिलिप होमको आदेशसँगै कानुनी विवाद जारी रहेकै अवस्थामा पनि सहर प्रशासनले थप शुल्क सङ्कलन सम्बन्धी काम कारबाही पुनः सुरु गर्न पाएको छ।
घरधनीहरूको पक्षबाट मुद्दा लडिरहेका अधिवक्ता र्यान्डी मास्ट्रोले सहर प्रशासनको यो कदमको तीव्र आलोचना गरेका छन्। उनले भने, सहर प्रशासनले आफ्ना गल्तीहरू स्वीकार गर्नुको साटो स्थायी बासिन्दा रहेका घरधनीहरूलाई नै दुःख दिने काम गरिरहेको छ।
मास्ट्रोले मेयर मामदानीमाथि गैरकानुनी रूपमा हजारौँ घरधनीहरूलाई थप शुल्कको नोटिस पठाएको आरोप लगाए। उनले आगामी १८ दिनपछि हुने अदालतको पूर्ण सुनुवाइमा आफूहरूले स्थायी राहत पाउने विश्वास व्यक्त गरेका छन्।
यो मुद्दा करको दर वा नियममा भन्दा पनि प्रशासनले लागू गरेको प्रक्रियामा केन्द्रित छ। घरधनीहरू रेचेल ओ’ब्रायन, कार्माइन मोरानो र साइमन हेडलीले दायर गरेको मुद्दा अनुसार,सहर प्रशासनले घरमा मालिक आफैँ बसेको छ वा छैन भन्ने अनुसन्धान नगरीकनै घरधनीहरूलाई नै आफू त्यहाँ बस्ने प्रमाण पेस गर्न बाध्य पारेको आरोप छ। करिब ९ लाखभन्दा बढी घरधनीहरूको नाम समावेश गरी सार्वजनिक गरिएको पूरक सूचीले मानिसहरूमा अन्योल र असन्तुष्टि बढाएको छ।
सहरको वित्त विभागले भने ५ मिलियन डलरभन्दा बढी मूल्यका दोस्रो घर भएका करिब १७,००० घरधनीहरूलाई मात्र मुख्य रूपमा सूचना पठाएको र यसबाट वार्षिक ५०० मिलियन डलर राजस्व सङ्कलन हुने लक्ष्य राखिएको जनाएको छ।
बिहीबारको आदेश प्रक्रियागत मात्रै भएकाले यसले अन्तिम निर्णय दिएको छैन। दुवै पक्ष अगस्ट ३१ मा पुनः तल्लो अदालतमा उपस्थित हुनेछन्, जहाँ घरधनीहरूले स्थायी आदेशको माग गर्नेछन्।