अमेरिकी पूर्वसैनिककी श्रीमती ग्रिन कार्ड अन्तर्वार्ताकै क्रममा पक्राउ, ६६ दिनको हिरासतपछि देशनिकाला गरिँदै
फोटो: होमल्याण्ड सेक्युरिटी
अमेरिकी सेनाका एक पूर्वसैनिकसँग एक दशकभन्दा बढी समयदेखि वैवाहिक जीवन बिताउँदै आएकी लिथुआनियाली नागरिक आइरिडा गुल्डलाई ग्रिन कार्डको अन्तर्वार्ताकै क्रममा अध्यागमन अधिकारीहरूले हिरासतमा लिएका छन्। ६६ दिन हिरासतमा राखिएपछि उनलाई अमेरिकाबाट युरोप देशनिकाला गर्न लागिएको उनका पति र स्थानीय सञ्चारमाध्यमहरूले जनाएका छन्।
आइरिडाका पति तथा अमेरिकी पूर्वसैनिक मार्क गुल्डका अनुसार, गत मे १६ मा उनीहरू ग्रिन कार्ड प्रक्रियाको ‘अन्तिम चरण’का लागि अध्यागमन कार्यालय पुगेका थिए। सोही दिन बिहान युएससीआईएसले उनीहरूको विवाह सक्कली र वैध भएको पुष्टि गर्दै ‘म्यारिज पिटिसन’ स्वीकृत गरेको थियो।
हाम्रो वैवाहिक सम्बन्ध र परिवार साँचो हो र आइरिडा यहीँकी हुन् भन्ने कुरा सरकारी निकायले पुष्टि गर्यो, मार्कले भने, तर त्यसको केही घण्टामै, सोही भवनमा मेरी श्रीमतीलाई हतकडी लगाएर आइसका अधिकारीहरूले लिएर गए।
अध्यागमन अदालतको रेकर्ड अनुसार आइरिडाविरुद्ध सन् २००९ देखिकै देशनिकालाको आदेश विचाराधीन थियो। मार्कका अनुसार, सन् २००९ मा सडक निर्माणका कारण गाडी जाममा परेर उनी अदालतको सुनुवाइमा केही समय ढिला पुगेकी थिइन्। सोही कारण उनीविरुद्ध अनुपस्थितिमा देशनिकालाको आदेश जारी भएको थियो।
हाल उनका कानुनी प्रतिनिधिहरूले यो मुद्दा पुनः ब्युँताउन ‘बोर्ड अफ इमिग्रेसन एपिल्स’ मा आपतकालीन निवेदन दर्ता गराएका छन्।
सन् २००० मा अमेरिका आएकी आइरिडाका तीन जना अमेरिकी नागरिक सन्तान (लुकस २३, जेमी २०, र नोयुस १७) छन्। उनी विगत दुई दशकदेखि ‘लिबर्टीभिल मसाज थेरापी’मा लाइसेन्सप्राप्त मसाज थेरापिस्टका रूपमा कार्यरत छिन्।
६६ दिनको हिरासत बसाइपछि उनलाई युरोप फिर्ता पठाउन लागिएको छ। उनका पति मार्कले सामाजिक सञ्जालमा भिडियो जारी गर्दै भनेका छन्, अन्तमा केही नगद र सामान दिन मात्र अनुमति दिइयो। मैले उनलाई भेट्न र अँगालो हाल्न मागेको निवेदन अस्वीकार गरियो।
भर्खरैका महिनाहरूमा अमेरिकी अध्यागमन निकायहरूले नियमित चेक-इन र ग्रिन कार्ड अन्तर्वार्ताका क्रममै पुरानो आदेश भएका व्यक्तिहरूलाई पक्राउ गर्ने क्रम बढाएका छन्। अमेरिकी नागरिकसँगको विवाहलाई स्थायी बसोबासको बलियो आधार मानिए तापनि हालका दिनहरूमा कागजी प्रक्रिया र पुराना कानुनी पृष्ठभूमिमाथि थप सूक्ष्म अनुसन्धान र कडाइ गर्न थालिएको छ।