माओवादीले बादललाई राष्ट्रिय सभा सदस्य बनाउने
प्रकाशित मिति : कार्तिक १६, २०७४ बिहीबार
१६ कात्तिक, काठमाडौं । माओवादी केन्द्रले नेता रामबहादुर थापा (बादल)लाई राष्ट्रिय सभा सदस्य बनाउने भएको छ ।
बादलले चितवन क्षेत्रनम्बर २ मा प्रत्यक्ष तर्फको उम्मेदवार दावी गरेका थिए । एमालेले चितवन २ नछाड्ने अडान लिएपछि बादललाई काठमाडौं १० वा नवलपुर १ बाट उम्मेदवार बनाउने प्रयास माओवादीले गरेको थियो ।
तर बादलले गृहजिल्ला चितवन बाहेक अन्तबाट चुनाव नलड्ने बताएपछि उनको नाम प्रत्यक्ष तर्फका उम्मेदवारहरुको सूचीमा परेन । उनले प्रत्यक्ष तर्फ चुनाव लड्ने इच्छा देखाएपछि समानुपातिकको सूचीमा पनि नाम राखिएको थिएन । त्यसैले अब उनलाई राष्ट्रिय सभामा लैजाने माओवादीले आश्वासन दिएको छ ।
माओवादी स्रोतले अनलाइनखबरसँग भन्यो, ‘वाम गठवन्धन लगायतका विविध कारणले बादल जीलाई यसपटक टिकट दिन सकिएन । अब उहाँलाई राष्ट्रिय सभामा सिट सुरक्षित गरिने छ ।’
नेपालमा प्रतिनिधि सभा र राष्ट्रिय सभा नामका दुई सदन सहितको एक संघीय व्यवस्थापिका हुनेछ । राष्ट्रिय सभामा प्रत्येक प्रदेशबाट आठ-आठ जना चुनिएर आउँछन् भने सरकारको सिफारिसमा राष्ट्रपतिबाट तीन जना मनोनित हुन्छन् ।
प्रतिनिधिसभामा भने १६५ निर्वाचन क्षेत्रबाट प्रत्यक्ष निर्वाचित भएकाहरु र समानुपातिकबाट चुनिएका ११० जना गरी जम्मा २७५ सदस्य हुन्छन् ।