३ मंसिर २०८३, बिहिबार| Thursday, November 19, 2026
अमेरिका

अमेरिकामा १९ वर्षीय युवकलाई ३५ वर्ष जेल सजाय, आमा भइन् भावुक

अमेरिकामा खेलाडीको हत्या गर्ने युवकलाई ३५ वर्ष जेल सजाय सुनाइएको छ। अमेरिकाको टेक्सास राज्यमा विद्यालयस्तरीय ट्र्याक एन्ड फिल्ड प्रतियोगिताका क्रममा प्रतिद्वन्द्वी टोलीका १७ वर्षीय खेलाडीको छुरा प्रहार गरी हत्या गर्ने किशोर दोषी ठहर भएका हुन्। अदालतले उनलाई ३५ वर्षको जेल सजाय सुनाएको छ।

डलास नजिकैको फ्रिस्को सहरमा भएको यस घटनाले सामाजिक सञ्जाल र राष्ट्रिय सञ्चारमाध्यमहरूमा व्यापक चर्चा पाएको थियो। अदालतको जुरीले १९ वर्षीय कार्मेलो एन्थोनीको आत्मरक्षाको दाबी अस्वीकार गर्दै उनलाई हत्या अभियोगमा दोषी ठहर गरेको हो।

उनले गत वर्ष विद्यालयस्तरीय खेलकुद प्रतियोगिताका क्रममा १७ वर्षीय अस्टिन मेटकाल्फमाथि छुरा प्रहार गरेका थिए। दोषी ठहर गरिएपछि एन्थोनीका वकिलले उनलाई अँगालो हालेर सान्त्वना दिएका थिए। एन्थोनी स्वयंले भने अदालतमा बयान दिएका थिएनन्।

घटनापछि सामाजिक सञ्जालमा यसलाई जातीय रङ दिने प्रयास गरिएको थियो। एन्थोनी अश्वेत समुदायका हुन् भने मेटकाल्फ श्वेत समुदायका थिए। तर अभियोजन र प्रतिरक्षा दुवै पक्षले जुरीसमक्ष यो घटना जातीय कारणले नभई व्यक्तिगत विवादका कारण भएको बताएका थिए।

जुरीले तीन घण्टाभन्दा कम समय छलफल गरेर फैसला सुनाएको थियो। उनीहरूसँग हत्याभन्दा कम गम्भीर मानिने ‘मानवहत्या’ को अभियोगमा दोषी ठहर गर्ने विकल्प पनि थियो। तर जुरीले प्रत्यक्ष हत्या अभियोगलाई नै स्वीकार गर्‍यो। फैसला सुनाइनेबित्तिकै एन्थोनीकी आमा काला हेयसले अदालतमा भावुक हुँदै छोराको कामप्रति अत्यन्त पछुतो रहेको बताएकी थिइन्।

अप्रिल २०२५ मा भएको विद्यालयस्तरीय ट्र्याक एन्ड फिल्ड प्रतियोगितामा विभिन्न विद्यालयका विद्यार्थीहरू सहभागी थिए। प्रतियोगिताका क्रममा एन्थोनी मेटकाल्फको विद्यालय ‘मेमोरियल हाई स्कुल’ को टोलीका लागि बनाइएको टेन्टमुनि बसेका थिए। साक्षीहरूका अनुसार मेटकाल्फ र उनका साथीहरूले पटक–पटक एन्थोनीलाई त्यहाँबाट जान आग्रह गरेका थिए। त्यसपछि दुवैबीच विवाद बढ्दै गएको थियो।

प्रतिरक्षा पक्षका वकिल माइक होवार्डले मेटकाल्फलाई एन्थोनीमाथि हात हाल्ने कानुनी अधिकार नभएको तर्क गरेका थिए। अभियोजन पक्षले भने एन्थोनी नै विवादको सुरुवात गर्ने व्यक्ति रहेको दाबी गरेको थियो। साक्षीहरूले पनि उनी आक्रामक भूमिकामा रहेको बताएका थिए। दुवै किशोर फ्रिस्कोका बासिन्दा भए पनि उनीहरू पहिले एकअर्कालाई चिन्दैनथे।

मुद्दाले देशव्यापी ध्यान आकर्षित गरेपछि कोलिन काउन्टी अदालत परिसरमा कडा सुरक्षा व्यवस्था गरिएको थियो। एन्थोनी र मेटकाल्फ दुवैका अभिभावकले आफ्ना छोराहरू मेहनती विद्यार्थी रहेको र भविष्यमा कलेज शिक्षा हासिल गर्ने योजनामा रहेको बताएका थिए।

खसोखासका समाचार नछुटाउनुहोस्Follow Khasokhas for immigration, green card, tax and community news.Facebook मा Follow गर्नुहोस् →

तर विद्यालयस्तरीय खेल प्रतियोगितामा सुरु भएको सामान्य विवादले अन्ततः एक किशोरको ज्यान लियो भने अर्का किशोरलाई दशकौँ लामो जेल जीवनतर्फ धकेल्यो। यो घटनाले विद्यालयमा हुने झगडा, हिंसा र युवाहरूको आवेगपूर्ण व्यवहारका गम्भीर परिणामबारे पुनः बहस सुरु गराएको छ।