३ मंसिर २०८३, बिहिबार| Thursday, November 19, 2026
अमेरिका

क्यालिफोर्निया एउटा काउन्टीमा रासायनिक चुहावटपछि संकटकाल,५० हजार नागरिक विस्थापित

फोटो : स्पेन्सर डेमेरा / अन्स्प्ल्यास

क्यालिफोर्नियाको गार्डेन ग्रोभस्थित ‘जीकेएन एरोस्पेस’ कम्पनीमा रहेको एउटा रासायनिक ट्याङ्कबाट अत्यधिक प्रज्वलनशील र विषाक्त रसायन ‘मिथाइल मेथाक्रिलेट’ चुहावट भएपछि गत बिहीबार अग्निनियन्त्रकहरूलाई सतर्क गराइएको थियो। ओरेन्ज काउन्टी फायर अथोरिटीका अधिकारीहरूका अनुसार, यदि उक्त ट्याङ्क पूर्ण रूपमा असफल भएको भए करिब ७,००० ग्यालन रसायन पोखिने वा ठूलो विस्फोट हुने खतरा थियो।

शनिबार राति टोलीले ट्याङ्कमा एउटा सानो चिरा परेको फेला पारेका थिए, जसले ट्याङ्कभित्रको अत्यधिक दबाब घटाउन मद्दत पुर्‍याएको र सुरक्षा टोलीको कार्यदिशा नै बद्लिदिएको थियो। आइतबार अधिकारीहरूले ट्याङ्कभित्रको दबाब मापन गर्न र आगामी कदम तय गर्न ‘रातभरको विशेष अभियान’ सञ्चालन गरिने घोषणा गरे। सोमबार अधिकारीहरूले उक्त अपरेशन सफल भएको र ठूलो विस्फोटको खतरा अब टरेको जानकारी दिएका छन्।

यस रासायनिक संकटका कारण गार्डेन ग्रोभ, बुएना पार्क, आनाहाइम, स्ट्यान्टन, वेस्टमिनिस्टर र साइप्रस लगायतका क्षेत्रका करिब ५०,००० बासिन्दाहरूलाई अनिवार्य स्थानान्तरणको आदेश दिइएको थियो। रेडक्रसका आश्रयस्थलहरू यतिबेला पूर्ण रूपमा भरिएका छन्, जसले गर्दा कहिले घर फर्कन पाइएला भनी अन्योलमा परेका विस्थापित नागरिकहरूको कष्ट थप बढेको छ।

क्यालिफोर्नियाका गभर्नर ग्याभिन न्यूसमले ओरेन्ज काउन्टीमा संकटकाल घोषणा गर्दै राष्ट्रपति डोनाल्ड ट्रम्पसँग संघीय आपत्कालीन सहायताका लागि अनुरोध गरेका थिए, जसलाई राष्ट्रपति ट्रम्पले सोमबार स्वीकृत गरेका छन्। यसैबीच, ओरेन्ज काउन्टीका डिस्ट्रिक्ट एटोर्नी टोड स्पिट्जरले जीकेएन एरोस्पेसमाथि अनुसन्धान सुरु गर्दै कम्पनीका भित्री गल्ती-कमजोरीबारे थाहा पाउने सूचनादाताहरू लाई अगाडि आउन आह्वान गरेका छन्।

५०,००० विस्थापित नागरिक कहिले घर फर्कन पाउँछन् भन्ने निश्चित नभइरहेका बेला, सोमबार ओरेन्ज काउन्टीका विद्यालयहरूले यस हप्ताका लागि आफ्ना शैक्षिक योजनाहरू सार्वजनिक गरेका छन्। यसअघि गत शुक्रबार गार्डेन ग्रोभ युनिफाइड स्कुल डिस्ट्रिक्टका एक दर्जनभन्दा बढी विद्यालयहरू बन्द गरिएका थिए भने साभाना, वेस्टमिनिस्टर र साइप्रस स्कुल डिस्ट्रिक्टले पनि सोही कदम पछ्याएका थिए।

 प्रभावित विद्यालयहरूले अब अनलाइन माध्यमबाट पढाइ सञ्चालन गर्नेछन्। यससम्बन्धी निर्देशन प्रधानाध्यापक वा शिक्षकहरूले विद्यार्थी र परिवारलाई उपलब्ध गराउनेछन्। स्थानान्तरणका कारण कक्षामा उपस्थित हुन नसक्ने विद्यार्थीहरूलाई सजाय नगरिने र समुदायको सुरक्षा नै आफूहरूको उच्च प्राथमिकता रहेको जिल्ला अधिकारीहरूले बताएका छन्।

ओरेन्ज काउन्टी शेरिफ कार्यालयको विपद् व्यवस्थापन वेबसाइटका अनुसार स्ट्यान्टनमा रहेको ‘रोबर्ट एम. पाइल्स स्टेम एकेडेमी’ आगामी केही दिनसम्म बन्द रहनेछ।

‘समर एकेडेमी सञ्चालन भइरहेका विद्यालयहरू सहित यस क्षेत्रका सबै क्याम्पसहरू आगामी शुक्रबारसम्म पूर्ण रूपमा बन्द रहनेछन्। यहाँको समर एकेडेमी एक हप्ता पछि सारेर जुन १ तारिखदेखि मात्र सुरु गरिनेछ।

खसोखासका समाचार नछुटाउनुहोस्Follow Khasokhas for immigration, green card, tax and community news.Facebook मा Follow गर्नुहोस् →

सुरक्षित घोषणा नभएसम्म ‘फ्राईबर्गर एलिमेन्ट्री’ र ‘सेक्वोया एलिमेन्ट्री’ विद्यालयहरू बन्द रहनेछन्। यी दुवै विद्यालयहरू उच्च जोखिमयुक्त क्षेत्र भित्र पर्दछन्। यहाँका विद्यार्थीहरूका लागि मंगलबारदेखि अनलाइन कक्षाहरू सुरु हुनेछन्।

लेखक रमेश फुल्लेल

रमेश फुल्लेलले खसोखासका लागि समसामयिक विषयमा रिपोर्टिङ गर्छन्। नेपालका अनलाइन सञ्चारमाध्यममा रिपोर्टिङको अनुभव बटुलेका उनले राजनीति, अध्यागमन लगायतका विषयमा समाचार लेख्दै आएका छन्। साथै, उनले स्थानीय जनसरोकारका विषयमा समेत रिपोर्टिङ र विश्लेषण प्रस्तुत गर्दै आएका छन्।

यस लेखकका थप समाचार →