अमेरिकी पेट्रोल पम्पहरूमा साइबर आक्रमण, इरान शंकाको घेरामा
प्रकाशित मिति : १ जेष्ठ २०८३, शुक्रबार
फोटो : शन क्लार्क / अनस्प्ल्यास
अमेरिकी पेट्रोल पम्पहरूमा रहेको इन्धन भण्डारण प्रणालीमा साइबर आक्रमण भएको आशंका गरिएको छ। अमेरिकी अधिकारीहरूले इरानसँग सम्बन्धित ह्याकर समूहहरूले विभिन्न राज्यमा रहेका इन्धन भण्डारण प्रणालीमा नै साइबर हमला गरेको हुनसक्ने आँकलन गरेका छन्।
ह्याकरहरू ग्यास स्टेसनमा रहेका इन्धन ट्याङ्कीको मात्रा निगरानी गर्ने प्रणालीमा प्रवेश गरेका थिए। ती ह्याकरहरूले इन्टरनेटमा खुला अवस्थामा रहेका र पासवर्ड सुरक्षा नभएका “अटोमेटिक ट्याङ्क गेज” प्रणालीको कमजोरीको फाइदा उठाएका थिए।
स्रोतहरूका अनुसार उनीहरूले केही अवस्थामा ट्याङ्कीमा देखाइने इन्धनको विवरण परिवर्तन गर्न सके पनि वास्तविक इन्धनको परिमाणमा भने असर परेको छैन।
हालसम्म उक्त साइबर आक्रमणबाट कुनै भौतिक क्षति वा मानवीय हानि भएको पुष्टि भएको छैन। तर, अमेरिकी अधिकारीहरू र साइबर सुरक्षा विज्ञहरूले यस्तो पहुँचले ग्यास चुहावटजस्ता खतरनाक अवस्थाहरू लुकाउन सक्ने भएकाले सुरक्षा चिन्ता बढाएको बताएका छन्।
अनुसन्धानमा संलग्न स्रोतहरूका अनुसार इरानले विगतमा पनि यस्ता इन्धन प्रणालीलाई निशाना बनाएको इतिहास भएकाले उसलाई नै मुख्य शंकाको घेरामा राखिएको हो।
यद्यपि, ह्याकरहरूले पर्याप्त प्राविधिक प्रमाण नछोडेकाले जिम्मेवार पक्षलाई निश्चित रूपमा पहिचान गर्न कठिन हुन सक्ने अमेरिकी अधिकारीहरूको भनाइ छ।
अमेरिकी साइबर सुरक्षा तथा पूर्वाधार सुरक्षा निकाय र एफबीआई ले यस विषयमा औपचारिक टिप्पणी गर्न अस्वीकार गरेका छन्।
इरानको संलग्नता पुष्टि भएमा अमेरिका-इजरायल र इरानबीच जारी युद्धका बीच इरानले अमेरिकी महत्वपूर्ण पूर्वाधारमाथि खतरा उत्पन्न गरिरहेको यो पछिल्लो उदाहरण हुने बताइएको छ।
यस घटनाले अमेरिकी राष्ट्रपति डोनाल्ड ट्रम्प प्रशासनलाई राजनीतिक दबाब पनि बढाउन सक्ने अनुमान गरिएको छ; किनभने युद्धका कारण बजारमा इन्धनको मूल्य पहिले नै बढिरहेको छ।
हालै सार्वजनिक गरिएको एक सर्वेक्षणअनुसार ७५ प्रतिशत अमेरिकी वयस्कहरूले इरान युद्धले आफ्नो आर्थिक अवस्थामाथि नकारात्मक असर पारेको बताएका छन्।
साइबर सुरक्षा विज्ञहरूले अमेरिकाका धेरै महत्वपूर्ण पूर्वाधार प्रणालीहरू अझै पर्याप्त सुरक्षित नभएको चेतावनी दिएका छन्। इरानी ह्याकर समूहहरूले वर्षौंदेखि तेल, ग्यास र पानी आपूर्ति प्रणालीसँग सम्बन्धित कमजोर कम्प्युटर प्रणालीहरूलाई लक्ष्य बनाउँदै आएका छन्।
साइबर सुरक्षा कम्पनीका विज्ञ एलिसन विकफका अनुसार इरानले अहिले छिटो नयाँ हानिकारक सफ्टवेयर विकास गर्ने, कृत्रिम बुद्धिमत्ता को प्रयोग गरी जासुसी र फिसिङ अभियान विस्तार गर्ने तथा सञ्चारमाध्यम र अमेरिकी नागरिक पूर्वाधारमाथि “ह्याक एन्ड लिक” अभियान चलाउने रणनीति अपनाइरहेको छ।
सन् २०२४ को अमेरिकी राष्ट्रपति निर्वाचनका क्रममा पनि इरानी ह्याकरहरूले ट्रम्पको चुनावी अभियानका आन्तरिक कागजातहरू चोरेर सञ्चारमाध्यमलाई पठाएको अमेरिकी अधिकारीहरूको दाबी छ।