न्यूयोर्कमा सित्तैमा एयर कन्डिसनर र पंखा बाँडिँदै: आवेदन खुला
फोटो: अल्भारो बर्नाल
न्यूयोर्क राज्यले गर्मी मौसमको आगमनसँगै न्यून आय भएका परिवारहरूलाई राहत दिन ‘होम इनर्जी असिस्टेन्स प्रोग्राम’ अन्तर्गत सन् २०२६ को कुलिङ असिस्टेन्स सुविधाको आवेदन खुला गरेको छ। अप्रिल १५ देखि सुरु भएको यस कार्यक्रममार्फत योग्य बासिन्दाहरूले सित्तैमा एयर कन्डिसनर वा पंखा प्राप्त गर्न सक्नेछन्। बढ्दो तापक्रम र गर्मीका कारण स्वास्थ्यमा पर्न सक्ने जोखिमलाई कम गर्न राज्य सरकारले हरेक वर्ष यो सहयोग उपलब्ध गराउँदै आएको छ।
यस कार्यक्रम अन्तर्गत एक योग्य परिवारले एउटा कुलिङ युनिट प्राप्त गर्न सक्नेछन्, जसमा झ्यालमा राख्ने पोर्टेबल वा वाल स्लिभ एयर कन्डिसनरहरू समावेश छन्। यदि घरको बनावटका कारण एयर कन्डिसनर जडान गर्न सम्भव नभएमा सरकारले पंखा उपलब्ध गराउनेछ।
यस सुविधामा उपकरणको खरिद मात्र नभई, त्यसको जडान सेवा, सुरक्षित सेटअपका लागि आवश्यक सामान्य मर्मत र पुराना युनिटहरू हटाउने खर्च समेत समावेश गरिएको छ। सरकारले पोर्टेबल वा विन्डो युनिटका लागि जडान खर्चसहित ८०० डलरसम्म र वाल स्लिभ युनिटका लागि १,००० डलर सम्मको बजेट तोकेको छ। यो सहायता ‘पहिलो आउनेलाई प्राथमिकता’ को आधारमा कोष रहुन्जेल मात्र वितरण गरिनेछ।
यो सुविधा लिनका लागि केही निश्चित मापदण्डहरू तोकिएका छन्। विशेषगरी घरको मासिक आम्दानी होम इनर्जी असिस्टेन्स प्रोग्रामको निर्देशिका भित्र हुनुपर्नेछ वा परिवारले फुड स्ट्याम्प जस्ता सरकारी सुविधाहरू लिइरहेको हुनुपर्नेछ। यसका साथै, घरमा ६० वर्षभन्दा माथिका जेष्ठ नागरिक, ६ वर्षमुनिका बालबालिका, वा गर्मीले स्वास्थ्यमा गम्भीर असर पर्ने खालका बिरामी भएका परिवारले यसमा प्राथमिकता पाउनेछन्।
आवेदन दिनका लागि घरमा कम्तीमा एकजना अमेरिकी नागरिक वा योग्य गैर-नागरिक हुनुपर्ने र विगत ५ वर्षभित्र यस कार्यक्रमबाट एयर कन्डिसनर सुविधा नलिएको हुनुपर्ने सर्त राखिएको छ।
इच्छुक बासिन्दाहरूले बसोबास, आम्दानी र पहिचानको प्रमाणसहित अनलाइन, फोन वा प्रत्यक्ष कार्यालयमा गएर आवेदन दिन सक्नेछन्। न्यूयोर्क सिटीका बासिन्दाहरूले अनलाइन मार्फत सजिलै आवेदन दिन सक्छन् भने अन्यले स्थानीय होम इनर्जी असिस्टेन्स प्रोग्राम कार्यालयमा सम्पर्क गर्नुपर्नेछ। राज्यभरि गर्मी बढ्दै गएको र कोष सीमित भएकाले अधिकारीहरूले योग्य व्यक्तिहरूलाई ढिला नगरी तुरुन्त आवेदन दिन प्रोत्साहन गरेका छन्।