वार्षिक एसाइलम शुल्क नतिरे आवेदन खारेज, वर्क परमिट पनि रद्द हुने
डिपार्टमेन्ट अफ होमल्याण्ड सेक्युरिटीले वार्षिक एसाइलम शुल्क तिर्न बाँकी रहेकाहरूले भोग्नुपर्ने परिणामबारे अन्तरिम अन्तिम नियम प्रकाशित गरेको छ। जसअन्तर्गत वार्षिक एसाइलम शुल्क नतिरेकाहरूका एसाइलम आवेदनहरू खारेज र अस्वीकृत गरिनेछन् भने पहिले नै प्रदान गरिएका वर्क परमिटहरू पनि रद्द गरिनेछन्।
उक्त विभागले २०२५ को बजेट मिलान कानुन अन्तर्गत नयाँ आप्रवासन शुल्क र आवश्यकताहरू लागू गर्ने अन्तरिम अन्तिम नियम बुधबार फेडरल रजिस्टरमा प्रकाशित गर्नेछ। यस नियमको उद्देश्य कार्यान्वयन सम्बन्धी गतिविधिका लागि बजेट वृद्धि गर्नुका साथै लागतको केही भार आवेदकमाथि सार्नु रहेको छ।
युएससीआईएसका अनुसार विचाराधीन अवस्थामा रहेका एसाइलम आवेदकहरूका लागि वार्षिक शुल्क कडाइका साथ कार्यान्वयन गरिनेछ। नियमअनुसार सूचनापछि ३० दिनभित्र शुल्क नतिरेमा एसाइलम आवेदन अस्वीकृत हुनेछ भने कानुनी हैसियत नभएका व्यक्तिहरूले देशनिकालाको प्रक्रिया पनि सामना गर्नुपर्ने हुन सक्छ।
यदि शुल्क नतिरेका कारण एसाइलम आवेदन अस्वीकृत भएमा युएससीआईएसले सम्बन्धित सबै वर्क परमिट अनुरोध अस्वीकार गर्ने नियममा उल्लेख छ। पहिले नै जारी गरिएको वर्क परमिट पनि तुरुन्त रद्द गरिनेछ।
यो नियम जुलाई २२, २०२५ मा प्रकाशित फेडरल रजिस्टर सूचनापछि आएको हो, जसले एसाइलममा फाइलिङ शुल्क र वार्षिक आवेदन शुल्क लागू गरेको थियो।
नियमका थप प्रावधानहरूमा गलत तरिकाले पेश गरिएका एसाइलम आवेदनहरूको फाइलिङ शुल्क फिर्ता नहुने व्यवस्था गरिएको छ। साथै, टेम्पोररी प्रोटेक्टेड स्टाटस (टीपीएस) प्राप्त व्यक्तिहरूका लागि वर्क परमिट अधिकतम एक वर्ष वा टीपीएसको बाँकी अवधिमध्ये जुन छोटो हुन्छ त्यत्तिसम्म मात्र मान्य हुने व्यवस्था गरिएको छ।
यस नियमले गैरआप्रवासी आगमन–प्रस्थान कागजात पुनःप्राप्त वा प्राप्त गर्न प्रयोग हुने फारमका लागि न्यूनतम २४ डलरको फाइलिङ शुल्क पनि तोकेको छ।
यो अन्तरिम अन्तिम नियम मे २९, २०२६ देखि लागू हुनेछ। युएससीआईएसले उक्त मितिदेखि आवश्यक शुल्क बिना पेश गरिएका फारम आई–१०२ आवेदनहरू अस्वीकार गर्ने जनाएको छ भने वार्षिक शुल्क नतिरेका विचाराधीन एसाइलम आवेदनहरू पनि अस्वीकृत गर्न थालिनेछ।
होमल्याण्ड सेक्युरिटीले यस नियमबारे सार्वजनिक प्रतिक्रिया जुन २९, २०२६ सम्म स्वीकार गर्ने जनाएको छ।