अमेरिकामा भीषण गोलीकाण्ड : ८ बालबालिका तथा किशोरकिशोरीको मृत्यु, १० जना घाइते
प्रकाशित मिति : ६ बैशाख २०८३, आइतबार
अमेरिकाको लुइसियाना राज्यस्थित श्रिभपोर्ट शहरमा आइतबार बिहान भएको एक दर्दनाक सामूहिक गोलीकाण्डमा आठ जना बालबालिका तथा किशोरकिशोरीको ज्यान गएको छ। घटनामा कुल १० जना गोली लागेर घाइते भएका छन् भने संदिग्ध आक्रमणकारी पनि प्रहरी कारबाहीमा मारिएको अधिकारीहरूले पुष्टि गरेका छन्।
श्रिभपोर्ट प्रहरी प्रमुख वेन स्मिथका अनुसार यो घटना ‘घरेलु प्रकृतिको’ रहेको प्रारम्भिक अनुसन्धानले देखाएको छ। मृतकहरूको उमेर करिब १ वर्षदेखि १४ वर्षसम्म रहेको बताइएको छ। तर मृतक तथा घाइते सबैको पहिचान हालसम्म सार्वजनिक गरिएको छैन।
प्रहरीका अनुसार गोलीकाण्ड एउटै स्थानमा मात्र नभई शहरका विभिन्न भागमा भएको हो। घटनामा एउटै ब्लकमा रहेका दुई वटा घर र नजिकैको अर्को क्षेत्रको एक तेस्रो घर समेत प्रभावित भएका छन्। यसले घटनालाई अझ जटिल र भयावह बनाएको अधिकारीहरूले बताएका छन्।
प्रहरी टोली बिहान करिब ६ बजे (पूर्वी समय अनुसार) घटनास्थलमा पुगेको थियो, जहाँ गोली प्रहारपछि घाइतेहरू फेला परेका थिए। प्रारम्भिक प्रतिक्रियापछि संदिग्ध व्यक्ति घटनास्थलबाट भागेका थिए।
भाग्ने क्रममा उनले नजिकै एउटा कारज्याकिङ (गाडी अपहरण) गरेको र त्यसपछि प्रहरीसँग गाडीमा उच्च(गतिको पीछा (चेज) भएको प्रहरीले जनाएको छ।
नियन्त्रणमा लिने क्रममा संदिग्ध र प्रहरीबीच झडप भएपछि प्रहरी अधिकारीहरूले गोली चलाएका थिए। सोही क्रममा संदिग्धको मृत्यु भएको प्रहरी प्रमुख स्मिथले पुष्टि गरेका छन्।
उनका अनुसार संदिग्ध एक्लै थिए । घटनामा अरू व्यक्तिको संलग्नता हालसम्म देखिएको छैन। तर संदिग्धको पहिचान सार्वजनिक गरिएको छैन।
प्रहरीले घटनाको विस्तृत अनुसन्धान जारी राखेको छ। घरेलु विवादसँग सम्बन्धित हुन सक्ने आशंका गरिएको भए पनि ठोस कारणबारे आधिकारिक निष्कर्ष निकालिएको छैन।