इराकमा सशस्त्र समूहको अपहरणमा परेकी अमेरिकी पत्रकार मुक्त
प्रकाशित मिति : २४ चैत्र २०८२, मंगलबार
फोटो : ज़िबिक स्ल्याश अनसप्ल्यास
अमेरिकी पत्रकार शेली किटल्सन अपहरणमुक्त भएकी छन्। इरान समर्थित एक सशस्त्र समूहको नियन्त्रणबाट किटल्सनलाई मुक्त गरिएपछि इराक सरकारले उनलाई आफ्नो संरक्षणमा लिएको एक वरिष्ठ सरकारी अधिकारीले जानकारी दिएका छन्।
उनका अनुसार, अहिले किटल्सनको यात्रा व्यवस्थापन गर्ने प्रक्रिया अगाडि बढाइएको छ। इराकमा सक्रिय इरान समर्थित सशस्त्र समूह ‘कताइब हिज्बुल्लाह’ले मंगलबार किटल्सनलाई रिहा गर्ने निर्णय गरेको जनाएको थियो।
समूहका सुरक्षा प्रमुख अबु मुजाहिद अल–अस्साफले सामाजिक सञ्जालमार्फत भनेका छन्, “उनलाई तुरुन्त देश छोड्ने सर्तमा रिहा गरिएको हो।”
मध्यपूर्वसम्बन्धी विषयमा रिपोर्टिङ गर्ने किटल्सनलाई गत महिना बग्दादबाट अपहरण गरिएको थियो। स्रोतका अनुसार, उनको अपहरण हुनुअघि नै अमेरिकी सरकारले उनलाई उक्त समूहद्वारा अपहरण वा हत्या हुन सक्ने चेतावनी दिएको थियो। त्यो चेतावनी उनी इराकमै रिपोर्टिङ गरिरहेको समयमा आएको बताइएको छ।
यसैबीचमा अमेरिका र इरानले दुई हप्ताको अस्थायी युद्धविराममा सहमति गरेका छन्। यो सहमति पाकिस्तानको मध्यस्थतामा भएको बताइएको छ। सहमतिपछि तत्कालका लागि दुवै पक्षले सैन्य आक्रमण रोक्ने निर्णय गरेका छन्।
इरानले पनि यो अवधिमा आफ्ना सैन्य गतिविधि रोक्ने र स्ट्रेट अफ होर्मुजमार्फत जहाज आवतजावतलाई सहज बनाउने प्रतिबद्धता जनाएको छ। इरानी सेनाले उक्त जलमार्गबाट जहाजहरूको सुरक्षित आवागमन सुनिश्चित गर्ने बताएको छ।
स्ट्रेट अफ होर्मुज विश्वकै महत्वपूर्ण तेल आपूर्ति मार्गमध्ये एक हो, जहाँबाट ठूलो मात्रामा तेल र ग्यास ओसारपसार हुन्छ। यस मार्गलाई निर्बाध रूपमा सञ्चालन गर्नु नै युद्धविरामको मुख्य सर्त मानिएको छ।
यस दुई हप्ते युद्धविरामलाई दीर्घकालीन शान्ति सम्झौताको अवसरका रूपमा हेरिएको छ। यस अवधिमा दुवै पक्षबीच थप गहन वार्ता हुने अपेक्षा गरिएको छ।