सम्झौतामा नआए इरानलाई एकै रातमा ध्वस्त पार्ने अमेरिकाको चेतावनी
अमेरिकी राष्ट्रपति डोनाल्ड ट्रम्पले इरानले समयसीमा भित्र सम्झौता नगरेमा “एकै रातमा ध्वस्त पार्ने” चेतावनी दिएका छन्। उनले इरानलाई विश्वका लागि अत्यन्त महत्त्वपूर्ण ऊर्जा मार्ग हर्मुज जलमार्ग पुनः खोल्न आग्रह गरेका छन्।
ट्रम्पले “स्वीकार्य” सम्झौताका लागि मङ्गलबार साँझ ८:०० बजे (वाशिङ्टन डीसी समय) सम्मको समयसीमा तोकेका छन्। ह्वाइट हाउसमा बोल्दै उनले इरानका नेताहरूले राम्रो नियतका साथ वार्ता गरिरहेको विश्वास व्यक्त गरे, तर अन्तिम परिणाम भने अनिश्चित रहेको भन्दै शङ्का व्यक्त गरे।
इरानले भने अस्थायी युद्धविरामको प्रस्ताव अस्वीकार गर्दै स्थायी रूपमा द्वन्द्व अन्त्य र प्रतिबन्ध हटाउनुपर्ने माग राखेको छ।
ट्रम्पले रक्षा मन्त्री पेट हेगसेथ सहितको संयुक्त पत्रकार सम्मेलनमा बोल्दै अमेरिकाले आवश्यक परे इरानको ऊर्जा तथा यातायात संरचनामा आक्रमण गर्न सक्ने चेतावनी दोहोर्याए।
“पूरै देश एकै रातमा समाप्त गर्न सकिन्छ र त्यो रात भोलि पनि हुन सक्छ,” ट्रम्पले भने। उनले थपे, समयसीमा नाघेपछि इरानलाई “ढुङ्गे युग” मा फर्काइनेछ। “उनीहरूसँग न पुल हुनेछ, न त बिजुलीघर नै,” उनले भने।
यद्यपि, ट्रम्पले अझै पनि वार्ता सकारात्मक दिशामा अघि बढिरहेको आशा व्यक्त गरेका छन्। क्षेत्रीय एक अधिकारीका अनुसार, युद्धविराम बिना सार्थक वार्ता सम्भव छैन। सञ्चार अवरोधका कारण इरानसँग सन्देश आदानप्रदान गर्न कठिन भइरहेको छ र प्रतिक्रिया आउन कम्तीमा एक दिन लाग्ने गरेको छ। यसबीच, पाकिस्तान, टर्की र इजिप्टले मध्यस्थता गर्ने प्रयास गरिरहेका छन्।
कानुनी विज्ञहरूले भने इरानको पूर्वाधारमा जानाजानी ठूलो स्तरमा आक्रमण गर्नु युद्ध अपराध हुन सक्ने चेतावनी दिएका छन्। यस्ता आक्रमणहरूले सर्वसाधारण जनतालाई लक्षित गर्ने भएकाले ती अन्तर्राष्ट्रिय कानुनविपरीत हुन सक्छन्। ट्रम्पले भने यसबारे आफू चिन्तित नभएको बताएका छन्।
उनले इरानका जनताले स्वतन्त्रताका लागि दुःख सहन तयार हुने दाबी पनि गरे। यद्यपि उनले सरकार परिवर्तन आफ्नो उद्देश्य नभएको बताए। ट्रम्पले बेलायत, नेटो र दक्षिण कोरियाजस्ता अमेरिकी सहयोगीहरूको आलोचना गर्दै उनीहरूले सहयोग नगरेको आरोप लगाए।
युद्ध सुरु भएयता अमेरिकाले इरानभर १३,००० भन्दा बढी आक्रमण गरिसकेको अमेरिकी सेनाको केन्द्रीय कमाण्डले बताएको छ।