तेल ढुवानी नरोक्न इरानलाई अमेरिकाको चेतावनी
प्रकाशित मिति : २५ फाल्गुन २०८२, सोमबार
राष्ट्रपति डोनाल्ड ट्रम्पको स्टेट अफ द युनियन सम्बोधन (आधिकारिक ह्वाइट हाउस फोटो /एमिली जे. हिगिन्स )
अमेरिकी राष्ट्रपति डोनाल्ड ट्रम्पले इरानलाई तेल ढुवानी नरोक्न चेतावनी दिएपछि अन्तर्राष्ट्रिय बजारमा तेलको मूल्य घट्न थालेको छ।
सोमबार तेलको मूल्य शुक्रबारको स्तरभन्दा केही कम देखिएको छ। दिनको सुरुवातमा मूल्य प्रति ब्यारल करिब १२० डलर पुग्ने अवस्था थियो, तर त्यसपछि मूल्यमा २५ डलरभन्दा बढीले गिरावट आएको छ।
आइतबार साँझ र सोमबार बिहान तेलको मूल्य दोहोरो अङ्कले बढेको थियो। इरानसँगको सम्भावित युद्धले तेल ढुवानीमा गम्भीर असर पार्ने डरका कारण मूल्य उक्लिएको हो।
फारसको खाडीमा पर्ने होर्मुज जलसन्धिमा व्यावसायिक जलयात्रा लगभग ठप्प भएको छ। यो मार्ग विश्वको करिब २० प्रतिशत तेल ढुवानीका लागि महत्त्वपूर्ण मानिन्छ। व्यावसायिक जहाजहरू यो मार्ग पार गर्न तयार नभएका र भण्डारण स्थलहरू भरिन थालेका कारण केही प्रमुख अरब तेल उत्पादक राष्ट्रहरूले उत्पादनमा कटौती गरेका छन्।
राष्ट्रपति डोनाल्ड ट्रम्पले होर्मुज जलसन्धि खुला राख्न अमेरिकी सेना संलग्न हुन सक्ने सङ्केत दिएका छन्। युद्ध चाँडै अन्त्य हुने सम्भावना रहेको ट्रम्पको धारणा सार्वजनिक भएपछि तेलको मूल्य थप घटेको हो।
ट्रम्पले होर्मुज जलसन्धिमा नियन्त्रण लिनेबारे विचार गरिरहेका छन्। उनले चेतावनी दिँदै भनेका छन्— यदि इरानले तेल ढुवानी रोक्ने प्रयास गरेमा उसले “अत्यन्त कडा” कारबाही भोग्नुपर्ने र त्यसको “ठूलो मूल्य” तिर्नुपर्नेछ।
उनले ढुवानी गर्ने कम्पनीहरूलाई राजनीतिक जोखिम बीमा उपलब्ध गराउने प्रतिबद्धता पनि दोहोर्याएका छन् र अमेरिकी सेना ट्याङ्करहरूलाई सुरक्षित रूपमा मार्ग पार गराउन सक्षम रहेको बताएका छन्।