थ्याङ्क्सगिभिङका लागि घर फर्किंदै थिइन् १९ वर्षीया विद्यार्थी, विमानस्थलमा पक्राउ परेपछि डिपोर्ट
प्रकाशित मिति : मंसिर ११, २०८२ बिहीबार
अमेरिकामा अध्ययनरत १९ वर्षीया कलेज छात्रा एनी लुसिया लोपेज बेलोजालाई थ्याङ्क्सगिभिङ बिदामा परिवारलाई सरप्राइज दिन घर फर्किने क्रममा बोस्टन विमानस्थलमा पक्राउ गरी हान्डुरास डिपोर्ट गरिएको छ। फेडेरल न्यायाधीशले देशनिकालामा रोक लगाउने आदेश दिए पनि उनलाई जबर्जस्ती देशनिकाला गरिएको उनका वकिलले बताएका छन् ।
लोपेज बेलोजा ८ वर्षको उमेरमा हान्डुरासबाट अमेरिकामा प्रवेश गरेकी थिइन्। गत शुक्रबार टेक्सासस्थित आफ्ना परिवारलाई भेट्न उडान चढ्न लाग्दा विमानस्थलका अधिकारीहरूले उनलाई रोकेका थिए । त्यसपछि, अधिकारीहरूले उनलाई पुरानो देशनिकाला आदेश रहेको भन्दै हिरासतमा लिए।
त्यस्तै, केही घन्टापछि प्राप्त न्यायिक आदेशअनुसार संघीय न्यायाधीशले उनलाई अमेरिकाबाट ननिकाल्न तथा म्यासाचुसेट्स बाहिर नपुर्याउन सरकारलाई निर्देशन दिएका थिए। तर, पोमरलोका अनुसार त्यही साँझ उनलाई टेक्सास लगियो र भोलिपल्ट हान्डुरास निकाला गरियो।
“उनी घर जान, परिवार भेट्न र फर्केर फाइनल परीक्षा दिन चाहन्थिन्। तर, अहिले उनी हान्डुरासमा बसिरहेकी छिन्,” पोमरलोले भने।
इमिग्रेशन एन्ड कस्टम्स एनफोर्समेन्ट (आइस) का एक प्रवक्ताले लोपेज बेलोजासँग २०१५ देखिको देशनिकाला आदेश रहेको र उनको निकासन सम्पन्न भएको पुष्टि गरेका छन्।