ट्रम्पले सिनेट रिपब्लिकनहरूसँग भने : ‘२०२६ को मध्यावधि निर्वाचन जित्नै पर्छ’
अमेरिकी राष्ट्रपति डोनाल्ड ट्रम्प
अमेरिकी राष्ट्रपति डोनाल्ड ट्रम्पले २०२६ को मध्यावधि निर्वाचनप्रति चिन्ता व्यक्त गरेका छन्। राष्ट्रपति पदमा पुनः फर्किएर एक वर्ष नबित्दै ट्रम्प प्रशासनको पहिलो ठूलो राजनीतिक परीक्षा मंगलबारका मुख्य राज्यीय निर्वाचनहरूमा हुँदैछ ।
भर्जिनिया र न्यु जर्सीले गभर्नर चयन गर्दैछन्, क्यालिफोर्नियाले संसदीय नक्सा पुनःआकंन गर्ने जनमत सङ्ग्रहमा मतदान गर्दैछ, र न्युयोर्क सिटीले नयाँ मेयर मंगलबार छान्दैछ । यी परिणामहरूले ट्रम्प प्रशासनका लागि आगामी वर्षका संसदीय निर्वाचनको राजनीतिक माहोलबारे सङ्केत दिन सक्छ।
ट्रम्पले सिनेट रिपब्लिकनहरूसँगको भेटमा भने, “हामीले मध्यावधि जित्नै पर्छ, नत्र हाम्रो सबै काम ‘कट्टर वामपन्थी लुनाटिक्स’ ले उल्ट्याइदिनेछन्।” उनले थपे, “हामी कम्युनिस्ट मेयरसहितको न्युयोर्कमा पुग्नेछौं, विश्वास गर्न सक्नुहुन्छ ?” ट्रम्पको सबैभन्दा बढी ध्यान न्युयोर्क सिटीको मेयर प्रतिस्पर्धामा केन्द्रित छ ।
पूर्व गभर्नर एन्ड्र्यु कुमो, डेमोक्र्याटिक जोहरन मम्दानी, र रिपब्लिकन कर्टिस स्लिवा बीचको प्रतिस्पर्धा चर्चामा छ। मम्दानी ट्रम्पका लागि नयाँ ‘राजनीतिक दुश्मन’ बनेका छन्। ट्रम्पले न्यु जर्सीका रिपब्लिकन उम्मेदवार ज्याक सियाटरेलीलाई पूर्ण समर्थन दिएका छन् । तर भर्जिनियामा उनले लिफ्टेनेन्ट गभर्नर विन्सम अर्ल सीअर्सलाई खुला समर्थन गर्न हिचकिचाएको देखिन्छ ।
“मलाई न्यु जर्सीमा मानिसहरूले मन पराउँछन्,” ट्रम्पले भने, “यो सामान्यतया डेमोक्र्याटिक राज्य हो, तर छिट्टै रिपब्लिकन हुँदैछ।” तर डेमोक्र्याट मिकी सेरिलसँगको प्रतिस्पर्धा कठिन छ । किनभने न्यु जर्सीमा डेमोक्र्याटिक मतदाता रिपब्लिकनभन्दा करिब ८ लाख बढी छन्। भर्जिनियामा सरकारी बन्द दुई महिनामा प्रवेश गर्दा सयौं हजार संघीय कर्मचारी र सैनिकहरू प्रभावित छन्।
ट्रम्पले मतदान बढाउनका लागि टेलिफोन र्याली र अन्तिम प्रचार कार्यक्रममा भाग लिए । उनी सप्ताहन्तमा फ्लोरिडास्थित आफ्नो मारा लागो रिसोर्टमै बसेका थिए । त्यसैबीच, पूर्व राष्ट्रपति बराक ओबामाले भर्जिनिया र न्यु जर्सीमा डेमोक्र्याटिक मतदाता परिचालनका लागि प्रचारसभाहरूमा भाग लिए।
“हाम्रो देश अहिले अँध्यारो अवस्थामा छ,” ओबामाले भने, “यो प्रशासनले प्रत्येक दिन नयाँ पागलपन प्रस्तुत गर्छ।” यदि डेमोक्र्याटहरूले भर्जिनिया र न्यु जर्सी दुवैमा जिते भने, यो परिणामले ट्रम्प र रिपब्लिकनहरूलाई आगामी निर्वाचनमा आउने चुनौतीबारे सङ्केत गर्न सक्छ ।
ट्रम्प प्रशासन देशभर नयाँ निर्वाचन क्षेत्र पुनःआकंन गर्ने अभियानमा लागेको छ । जसलाई आलोचकहरूले “राजनीतिक खेलको नियम बीचैमा परिवर्तन” भनेका छन् ।
टेक्सास, क्यालिफोर्निया, नर्थ क्यारोलाइना, मिसौरी, इन्डियाना र कन्सासमा यो प्रक्रियाले प्रतिनिधि सभामा रिपब्लिकनको सीट बढाउने सम्भावना देखाएको छ।
