आइसद्वारा १ हजार जनशक्ति थप गर्ने घोषणा
प्रकाशित मिति : श्रावण १५, २०८२ बिहीबार
अमेरिकी एजेन्सी आइस ले १ हजार भन्दा बढी जनशक्ति थप गर्ने भएको छ । राष्ट्रपति डोनाल्ड ट्रम्पको सामूहिक निष्कासन अर्थात मास डिपोर्टेशनको योजनालाई कार्यान्वयन गर्ने जिम्मेवारी आइस ले पाएको छ ।
यसै महिनाको सुरुवातमा पारित नयाँ बजेटपछि १ हजार भन्दा बढी व्यक्तिलाई प्राथमिकरूपमा रोजगारीको प्रस्ताव गरिसकेको आइसले बताएको छ ।
एजेन्सीकी प्रवक्ता ट्रिसिया म्याकलाफ्लिन ले जारी गरेको विज्ञप्तिमा जुलाई ४ पछि आइस ले १ हजार भन्दा बढी प्राथमिक रोजगारी प्रस्तावहरू जारी गरिसकेको बताइएको छ ।
जो बाइडन सरकारको समयमा काम गर्न नपाएको असन्तुष्टिमा अवकाश लिएका आइस अफिसरहरूलाई यो अवसर सबैभन्दा बढी दिइएको छ ।
“अब राष्ट्रपति ट्रम्प र गृह सुरक्षा मन्त्री नोएमको नेतृत्वमा आइस फेरि काममा फर्कन पाउँदा उत्साहित छ, र समाजबाट बलात्कारी, हत्यारा, गिरोह सदस्य तथा यौन अपराधीहरूलाई हटाउने अभियानमा जुट्नेछ ” उनले भनेकी छन ।
आइस ट्रम्प प्रशासनको इतिहासकै सबैभन्दा ठूलो डिपोर्टेशन अभियान कार्यान्वयन गर्ने प्रमुख एजेन्सी हो ।
नयाँ नीति अनुसार, आइस अफिसरहरूलाई दिनको कम्तीमा ३ हजार व्यक्तिलाई पक्रने लक्ष्य दिइएको छ । जुन ट्रम्पको दोस्रो कार्यकालको सुरुवाती पाँच महिनामा दैनिक ६५० थियो।
यो अभियान आप्रवासन अदालत, कार्यस्थल, बस्तीहरू र सडकहरूमा तीव्र रूपमा देखिन थालेको छ। ट्रम्पले हस्ताक्षर गरेको नयाँ कानुन अनुसार पाँच वर्षमा सीमा सुरक्षाका लागि १७० बिलियन डलर छुट्याइएको छ ।
आइस ले यसै हप्ताबाट नयाँ कर्मचारी भर्ना अभियान सुरु गरेको छ। नयाँ अफिसरहरूलाई ५० हजार डलर सम्म बोनस दिने प्रस्ताव गरिएको छ । स्टुडेन्ट लोन माफी र प्रयाप्त मात्रामा ओभरटाइम सुविधा पनि दिइने आइसले बताएको छ ।
यसरी ट्रम्प प्रशासनले कडा आप्रवासन नीतिको कार्यान्वयनमा ऐतिहासिक ढंगले बजेट वृद्धि, कर्मचारी विस्तार र डिपोर्टेशन लक्ष्य निर्धारण गर्दै अघि बढेको छ । जसले अमेरिकाको आप्रवासन प्रणालीमा ठुलो परिवर्तन ल्याउनेछ।