क्यालिफोर्नियामा नेपाली मृत फेला, घटनास्थलमा रगतका टाटा
प्रकाशित मिति : श्रावण १२, २०८२ सोमबार
क्यालिफोर्नियाको अल्मेदामा एकजना नेपाली मृत फेला परेका छन् । अल्मेदा काउन्टी प्रहरीले ४५ बर्षीय रमेश कुँवरलाई उनकै अपार्टमेन्टमा आइतबार मृत फेला पारेको पारिवारिक श्रोतले जानकारी दिएको छ । पारिवारिक श्रोतका अनुशार उनको मृत्यु केहीदिन अगाडि नै भएको अवस्थामा भेटिएको थियो भने घटनास्थलमा रगतका टाटाहरु समेत देखिएका थिए ।
थप जानकारीका लागि खसोखासले अल्मेदा प्रहरीलाई पनि सम्पर्क गरेको छ । प्रहरीले घटनाबारे जानकारी गराउन आफन्तको खोजी गरिरहेको जनाएको छ । घटनाका सन्दर्भमा अहिलेसम्म कसैलाई पक्राउ गरिएको छैन भने घटनामा अरु कसैको संलग्नता भएको आशंका पनि नगरिएको प्रहरीले जानकारी दिएको छ ।
कैलाली स्थायी घर भएका अविवाहित रमेश नेपालमा रहेको घरपरिवारसँग जुलाई २० देखि सम्पर्कविहिन रहेका थिए । जुलाई २० सम्म फोनकल र म्यासेज हुने गरेकोमा त्यसपछि सम्पर्क नभएको पारिवारिक श्रोतको भनाई छ ।
जुलाई २० भन्दा अगाडि दिदी र भाउजुसँग पनि फोनकल र म्यासेजमा सम्पर्क गरेका उनले दिदीसँगको कुराकानीमा आफूलाई घाँटीमा समस्या भएको र काममा नगएको बताएका थिए । २१ जुलाईमा सम्पर्क गर्दा मेसेज उनीसँग सम्पर्क हुन सकेको थिएन । परिवारले उनको मृत्यु २१ जुलाईमा नै भएको हुनसक्ने आशंका गरेको छ ।
नेपालमा रहेको घरपरिवारले उनको मृत्युको उचित छानविनका लागि आग्रह गरेको छ । अमेरिकामा उनको परिवारको कोहीपनि सदस्यहरु नरहेकाले रमेशको अन्तिम संस्कारका लागि सघाउन समेत नेपालमा रहेको परिवारले अमेरिकामा रहेको नेपाली समुदायलाई अनुरोध गरेको छ ।
रमेशका ९३ बर्षका बुबा नेपालमा नै हुनुहुन्छ भने आमाको देहवशान भइसकेको छ । त्रिचन्द्रमा इन्भायरोमेन्ट साइन्समा बीएससी गरेपछि विद्यार्थी भिसामा झण्डै १७ बर्ष अगाडि अमेरिका आएका रमेशको ग्रिनकार्ड आइसकेको थिएन भने उनले ग्रिनकार्ड प्रकृयामा रहेको परिवारलाई बताएका थिए ।
उनी सन् २०१५ पछि टीपीएसमा रहेको र गतबर्ष ट्राभल डकुमेन्टमा इन्डिया गएको समेत जनाइएको छ । नेपालीको टीपीएस अगस्त ५ बाट समाप्त हुँदै गरेको अवस्थामा उनी टीपीएसवाहेक कुन अध्यागमन स्टाटसमा थिए भन्नेबारे प्रष्ट छैन ।