न्युयोर्कका २१ बर्षीय रिकेन आचार्यमाथि ११ वर्षीया बालिकालाई यौन दुर्व्यवहार गरेको अभियोग
प्रकाशित मिति : असार २०, २०८२ शुक्रबार
न्युयोर्कका २१ बर्षीय रिकेन आचार्यमाथि ११ वर्षीया बालिकालाई यौन दुर्व्यवहार गरेको अभियोग लगाइएको छ । न्युयोर्कको लङ आइल्याण्ड फ्रैंकलिन स्क्वायर निवासी २१ बर्षका रिकेन आचार्यलाई बालिकामाथि दुव्र्यहारको आरोपमा पक्राउ गरेको थियो ।
तर आचार्यको पक्षले भने उनी निर्दोष रहेको र उनलाई फसाइएको दावी गरेको छ । आचार्यले पनि अदालतमा आफूविरूद्धका अभियोग स्वीकार गरेका छैनन् । आगामी साता अदालतमा पेश गरिने तय भएको छ भने परिवारले उनी निर्दोष सावित भएर रिहा हुने अपेक्षा गरेको छ ।
सीसीटिभी फूटेजमा पनि दुव्र्यहार पुष्टि नभएको पारिवारिक श्रोतको दावी छ । तर खसोखासले सीसीटिभी फूटेजको स्वतन्त्र रिभ्यु भने गरेको छैन । आचार्यलाई चिन्नेहरूले उनको स्वभाव नराम्रो नभएको खसोखाससँग दावी गरेका छन् । साथै आचार्यको विगतमा पनि कुनै गलत गतिविधिको रेकर्ड नरहेको पाइएको छ ।
रुजवेल्ट फिल्ड मलको सेफोरा स्टोरमा ११ वर्षीया बालिकालाई अनुपयुक्त रूपमा छोएको आरोपमा उनलाई पक्राउ गरिएको नाशा काउन्टी प्रहरीले जनाएको हो।
२१ वर्षीय रिकेन आचार्य साँझ ६ बजेतिर पसलबाट भागेका थिए । प्रहरीले अधिकारीहरूले आचार्यलाई नजिकै फेला पारेका थिए भने कुनै घटना बिना नै पक्राउ गरेका थिए । आचार्यविरुद्ध पहिलो डिग्री यौन दुर्व्यवहार र बच्चाको कल्याणलाई खतरामा पारेको अभियोग लगाइएको छ ।
उनलाई पक्राउपछि हेम्पस्टेडको अदालतमा पेश गरिएको थियो । अदालतको अभिलेख अनुशार आचार्यले हजुरआमासँगै रहेकी ११ वर्षीया बालिकाको नजिक पुगेर उनको खुट्टा नजिकैको पछाडिको तल्लो भाग निचोरेको अभियोग लगाइएको छ ।
पहिचान सुरक्षित राख्न अदालतको रेकर्डमा नाम उल्लेख नगरिएकी ती बालिकाले प्रहरीलाई उक्त घटनाले आफू अत्यन्तै डराएको तथा असहज अनुभव गरेको बताएकी थिइन् । अभियोजकहरूले आचार्यले पीडितलाई नचिनेको बताएका छन् ।
नोट : यो समाचार थप विवरण सहित अपडेट गरिएको छ ।
