जापान एयरलाइन्समा साइबर हमला, शेयर कारोवारमा गिरावट
प्रकाशित मिति : पुस ११, २०८१ बिहीबार
जापान एयरलाइन्समा साइबर आक्रमण भएको छ । जापान एयरलाइन्सले बिहीबार साइबर आक्रमण भएको बताएको छ ।
एयरलाइन्सले यसबाट घरेलु र अन्तर्राष्ट्रिय उडानहरूमा ढिलाइ भएको बताएका हो । तर पछि उक्त कारण पत्ता लगाएर समाधान गरिएको एयरलाइन्सले बताएको छ ।
ब्यागेज चेक–इन प्रणालीमा आएका समस्याहरूले धेरै जापानी विमानस्थलमा एक दर्जनभन्दा बढी उडानमा ढिलाइ भएको थियो ।
जापान एयरलाइन्स अल निप्पन एयरवेज पछिको देशको दोस्रो ठूलो एयरलाइन्स हो । यो खबर सार्वजनिक भएपछि एयरलाइन्सको शेयर कारोबारमा २.५ प्रतिशतसम्म गिरावट आएको थियो ।
त्यसपछि भने केही सुधार भयो । एयरलाइन्स साइबर आक्रमणबाट प्रभावित हुने पछिल्लो जापानी कम्पनी मात्र हो ।
जापानको अन्तरिक्ष एजेन्सी जाक्साले सन् २०२३ मा अज्ञात संस्थाहरूले साइबर आक्रमण गरेर प्रवेश गरेको तर रकेट वा स्याटेलाइटबारे कुनै संवेदनशील जानकारी प्राप्त नभएको बताएको थियो ।
जापानको साइबरट्याक्स विरुद्धको रक्षाका लागि जिम्मेवार एजेन्सी नेसनल सेन्टर अफ इन्सिडेन्ट रेडिनेस एन्ड स्ट्रेटेजी फर साइबरसिक्योरिटी (एनआइएससी) ले सन् २०२३ मा नै ह्याकरहरूले नौ महिनासम्म घुसपैठ गरेको बताएको छ ।
सन् २०२२ मा सरकारले टोयोटा आपूर्तिकर्तामा अवरोधको पछाडि साइबर आक्रमण भएको बताएको थियो । यसले शीर्ष बिक्री हुने अटो निर्मातालाई एक दिनका लागि घरेलु कारखानाहरूमा सञ्चालन रोक्न बाध्य तुल्याएको थियो ।
हालै लोकप्रिय जापानी भिडियो साझेदारी वेबसाइट निकोनिकोले ठूलो स्तरको साइबर आक्रमणको प्रभावमा परेको भन्दै जुन महिनामा आफ्ना सेवाहरू स्थगित गरेको थियो ।