एनपीएलको लागि टिकट मूल्य सार्वजनिक, उद्घाटन खेलमा सामान्यतर्फ ३०० र भिआइपीतर्फ ७००
प्रकाशित मिति : मंसिर १०, २०८१ सोमबार
प्रधानमन्त्री केपी शर्मा ओली सोमबार ऐतिहासिक धरहरा परिसरबाट नेपाल प्रिमियर लिग (एनपिएल) को ट्रफी अनावरण गर्दै । तस्बिर सौजन्यः प्रधानमन्त्रीको सचिवालय/रासस
यहीँ मङ्सिर १५ गतेदेखि हुन लागेको पहिलो संस्करणको नेपाल प्रिमियर लिग (एनपीएल)को लागि टिकट मूल्य तोकिएको छ ।
नेपाल क्रिकेट संघ (क्यान)ले सोमबार एक विज्ञप्ति जारी गर्दै टिकट मूल्य सार्वजनिक गरेको हो । मङ्सिर १५ गते हुने उद्घाटन खेलको लागि सामान्यतर्फ तीन सय रुपैयाँ र भिआइपीतर्फ सात सय रुपैयाँ टिकट मूल्य राखिएको क्यानले जनाएको छ ।
त्यस्तै, लिग चरणका अन्य खेलहरूको लागि सामान्यतर्फ तीन सय रुपैयाँ र भिआइपीतर्फ पाँच सय रुपैयाँ टिकट मूल्य तय गरिएको छ ।
एनपीएलको प्लेअफका खेल गर्न दर्शकहरूले सामान्यतर्फ पाँच सय रुपैयाँ र भिआइपीतर्फ सात सय रुपैयाँको टिकट काट्नुपर्नेछ ।
त्यस्तै, फाइनल खेलको लागि भने सामान्यतर्फ पाँच सय रुपैयाँ र भिआइपीतर्फ एक हजार रुपैयाँ टिकटको मूल्य तोकिएको क्यानले जनाएको छ ।
सिजनल पासको हकमा भने २० प्रतिशत छुटसहित सामान्यतर्फ चार हजार ४ सय ८० र भिआइपीतर्फ आठ हजार दुई सय ४० रुपैयाँ टिकटको मूल्य राखिएको छ ।