रोहिङ्गा मुस्लिम समुदायमाथि ज्यादती बढेको अधिकारवादीहरुको आरोप

उनीहरुले उक्त अल्पसंख्यक जातिको मानवअधिकार हनन् भएकोले त्यसो नगर्न र उनीहरुलाई पनि आफ्नो समुदायमा सुरक्षित हिसाबमा बस्न दिन विश्वका मानवअधिकारवादीहरुले आग्रह गरेका हुन् ।

उक्त हिंसाका कारण यहाँबाट दशौँ हजार जना शरणार्थी छिमेकमा पर्ने देश बङ्गलादेश पुगेका छन् । सो देशमा म्यानमारबाट दैनिक हजारौँजसो नागरिक बाहिरिएको तथ्यांक हालैमात्र संयुक्त राष्ट्रसंघले सार्वजनिक गरेको थियो ।
म्यानमारमा गत अगस्तबाट सुरु भएको हिंसाको कारण शरणार्थीको रुपमा त्यस समुदायका ती व्यक्ति बङ्गलादेश आइपुगेका संयुक्त राष्ट्रसंघले जानकारी दिएको छ ।

तर उक्त समुदायका नागरिकमाथि सुरक्षाकर्मीहरुले पनि ज्यादति गरेको गुनासो बढिरहेका बेला विश्वमा अधिकारवादीहरुले चासो राखेका हुन् । उनीहरुको घर बस्तीमा आगो लगाइएको र कुटपिट गरिएको भन्दै सुरक्षाका लागि अधिकारवादीहरुले चासो व्यक्त गरेका छन् ।

उनीहरुले म्यानमारको अल्पसंख्यक उक्त रोहिङ्गा मुस्लिममाथि पछिल्लो समयमा म्यानमारको राखिन राज्यमा सुरु भएको द्वन्द्वमा प्रहरीको ज्यादती भएको पाइएको जनाएका छन् । यस कारण उनीहरु पनि बङ्गलादेश छिर्ने सीमामा बसेका छन् ।

अधिकारवादीहरुले उनीहरुको बस्ती जलाइएको र कतिपय अवस्थामा उनीहरुलाई घरबाट परिवारसहित लखेटिएको पाइएको उनीहरुको आरोप छ ।

संयुक्त राष्ट्रसंघले दिएको जानकारी अनुसार गत अगस्त २५ बाट सोमबारसम्म बङ्गलादेश प्रवेश गर्ने म्यानमारका शरणार्थीको सङ्ख्या करिब ९२ हजार पुगेको थियो । यो क्रम अहिले पनि जारी रहेको उनीहरुको भनाई छ ।

म्यानमारको राखिन राज्यमा पछिल्लो समय जाती र धर्मका कारण हिंसा भड्किदै गएको छ । राष्ट्रसंघका अनुसार म्यानमारको रोहिङ्गा राज्यमा सुरु भएको हिंसापछि बङ्गलादेश भागेर जाने क्रम पनि बढेको हो ।

ज्यादती भएको छैन– सुकी 

यसैबीच म्यानमारका बिदेशमन्त्री एवम् म्यानमार राज्यका राज्य सल्लाहकार आङ सान सुकीले रोहिङ्गा समुदायका नागरिकमाथि सैनिक ज्यादती नभएको बताउनुभएको छ ।

उहाँले त्यस समुदायका नागरिकका बस्तीमा आगजनी गरिएको भन्नेजस्ता समाचारहरु आएकोमा त्यसको खण्डन गर्नुभएको छ । उहाँले यस्तो कुनै दुव्र्यबहार उनीहरुमाथि नभएको पनि स्पष्ट गर्नुभयो ।

उहाँले यी समाचारहरु आतङ्ककारीलाई सहयोग पुग्नेगरी आएका गुनासोगर्दै त्यस्तो कुनैपनि ज्यादतीको समाचार आफूले थाहा नपाएको पनि स्पष्ट गर्नुभएको प्राप्त समाचारमा जनाइएको छ ।

डुंगा डुब्दा पाँच बालबालिकाको मृत्यु 

यसैबीच प्राप्त एक अर्काे समाचारअनुसार म्यानमारबाट बङ्गलादेशतर्फ जाने क्रममा बुधबार बिहान डुंगा डुब्दा कम्तीमा पनि पाँच जना बालबालिकाको ज्यान गएको समाचार छ ।

प्राप्त समाचारअनुसार म्यानमारबाबाट भागिरहेका रोहिङ्गा जातिका शरणार्थी बङ्गलादेश जाने क्रममा एउटा डुंगा डुबेको हो । त्यसमा रहेका यात्रुमध्ये पाँच जना बालबालिकाको ज्यान गएको हो ।

म्यानमारको राखिन राज्यमा पछिल्लो समय जाती र धर्मका कारण हिंसा भड्किदै गएका कारण यहाँबाट भागेर बङ्गलादेश जाने क्रम पनि बढेको हो ।

बुधबार पनि बिहानैदेखि रोहिङ्गाहरु नाफ नदि भएर बङ्गलादेशतर्फ भागेर जाने क्रम सुरु भएको छ । बुधबार बिहानैदेखि कैयौँ डुंगाले उनीहरुलाई बोकिरहेका छन् ।

यसबीचमा कैयौँ डुंगा डुबेका कारण दर्जनौँको ज्यान गइसकेको छ । नाफ नदि म्यानमार र बङ्गलादेशको सीमामा पर्दछ । त्यस क्षेत्रमा सुरक्षाको प्रबन्ध गरिएको भनिए पनि दुर्घटनाहरु पनि भएका छन् ।