लोकसभा चुनावको भारतमा मतगणना जारी , प्रधानमन्त्री मोदीको गठबन्धनलाई सुरुवाती रुझानमा अग्रता
प्रकाशित मिति : जेष्ठ २१, २०८१ सोमबार
लोकसभा चुनावको भारतमा मतगणना सुरू भएको छ । मतगणना स्थानीय समयअनुसार बिहान ८ बजेदेखि सुरू भएको हो । मतपरिणाम आजै सार्वजनिक हुनेछ । लोकसभा ५४३ मध्ये ५४२ सिटको मतगणना भइरहेको छ ।
प्रारम्भिक चरणमा भारतीय जनता पार्टी भाजपा नेतृत्वको एनडिए गठबन्धनले अग्रता लिएको देखिएको छ ।
विभिन्न एक्जिट पोलहरूले भाजपा नेतृत्वको नेसनल डेमोक्र्याटिक अलायन्स एनडिए गठबन्धनले तेस्रो पटक चुनाव जित्ने प्रक्षेपण गरेको थियो ।
५४३ सदस्यीय लोक सभामा बहुमत पुर्याउन एनडिएलाई २७२ सिट चाहिन्छ । चुनावका यी प्रक्षेपण सही भएमा नरेन्द्र मोदी लगातार तीनपटक निर्वाचन जितेर भारतको प्रधानमन्त्री बन्नेछन् ।
यसअघि जवाहरलाल नेहरू पनि सन् १९५२, सन् १९५७ र सन् १९६२ मा गरी तीनपटक प्रधानमन्त्री बनेका थिए ।
मोदीले नेतृत्व गरेको एनडिए गठबन्धनले पछिल्ला दुई चुनाव, सन् २०१४ र २०१९ मा पनि बहुमत ल्याएको थियो ।
मोदी पछिल्ला दस वर्षदेखि भारतका प्रधानमन्त्री छन् । सन् २०१९ को निर्वाचनमा भाजपा एक्लैले ३०३ सिट सहित बहुमत ल्याएको थियो। यसपालि पनि उसले एक्लै बहुमत पुर्याउने अनुमान छ ।
भारतका एक्जिट पोलहरूले सन् २००४ र २००९ मा चुनावको ठीक प्रक्षेपण गर्न सकेका थिएनन् ।