आईपीएलमा लखनउले गुजरातलाई ३३ रनले हरायो, यश ठाकुर र क्रुणालको घातक बलिङ
प्रकाशित मिति : चैत्र २५, २०८० आईतबार
इन्डियन प्रिमियर लिग–२०२४ को २१ औं खेलमा लखनउ सुपरजायन्ट्सले गुजरात टाइटन्सलाई ३३ रनले पराजित गरेको छ । चालू सिजनमा लखनउको यो लगातार तेस्रो जित हो भने गुजरातले लगातार दोस्रो हार बेहोरेको छ । टाइटन्सले आफ्नो ५ खेलमध्ये ३ हारेको छ ।
आइतबार एकना रंगशालामा भएको खेलमा एलएसजीले टस जितेर पहिले ब्याटिङ रोजेको थियो र निर्धारित २० ओभरमा ५ विकेट गुमाएर १६३ रन बनाएको थियो । जवाफमा जीटी टोली १८.५ ओभरमा १ सय ३० रन बनाएर अलआउट भयो। खेलको प्लेयर अफ द म्याच यश ठाकुर भए । उनले ३० रन दिएर ५ विकेट लिए ।
एलएसजीका लागि मार्कस स्टोइनिसले ५८ रन बनाए । योसँगै निकोलस पूरनले ३२ र केएल राहुलले ३३ रनको योगदान पुर्याए । उमेश यादव र दर्शन नलकन्देले २–२ विकेट लिए ।
जवाफमा जीटीका साई सुदर्शनले सर्वाधिक ३१ रन बनाए । राहुल तेवाटियाले ३० रन र कप्तान शुभमन गिलले १९ रनको योगदान दिए । एलएसजीका यश ठाकुरले ५ विकेट लिए भने क्रुणाल पाण्ड्याले ३ विकेट लिए ।
टस जितेर ब्याटिङ रोजेको लखनउको सुरुवात खराब रह्यो । टोलीले १८ रनमा दुई विकेट गुमाएको थियो । यस्तो अवस्थामा केएल राहुल र मार्कस स्टोइनिसले ६२ बलमा ७३ रनको साझेदारी गर्दै इनिङ्सलाई सम्हाले । पछि निकोलस पुरन र आयुष बडोनीले स्कोर १६३ मा पुर्याए ।
१६४ रनको लक्ष्य पछ्याउने क्रममा गुजरातले उत्कृष्ट सुरुवात गरायो । दुवैले ३९ बलमा ५४ रनको साझेदारी गरे । तर गिल आउट भएपछि मध्यक्रममा कुनै साझेदारी हुन सकेन र टोली १३० रनमा अलआउट भयो।
लगातार तेस्रो जितपछि लखनउको टोली चालू सिजनको अंक तालिकामा तेस्रो स्थानमा पुगेको छ भने गुजरात लगातार दुई पराजय बेहोरे पनि सातौं स्थानमा छ । लखनउले ४ मध्ये ३ खेल जितेर ६ अंक जोडेको छ । दोस्रो ओभरमा ५ मध्ये ३ खेल गुमाएको गुजरातको खातामा ४ अंक छ ।