कोलकाताले बैंग्लोरलाई ७ विकेटले हरायो, विराट कोहलीको अर्धशतक छायामा
प्रकाशित मिति : चैत्र १६, २०८० शुक्रबार
India IPL Cricket
आईपीएल २०२४ को १० औं खेलमा कोलकाता नाइट राइडर्सले रोयल च्यालेन्जर्स बैंग्लोरलाई ७ विकेटले पराजित गरेको छ । यो सिजनमा घरेलु टोलीले लगातार ९ खेल जित्ने कीर्तिमान पनि तोडिएको छ ।
एम चिन्नास्वामी रंगशालामा भएको खेलमा कोलकाता नाइट राइडर्सले रोयल च्यालेन्जर्स बैंग्लोरलाई ७ विकेटले पराजित गरेको हो ।
टस हारेर पहिले ब्याटिङ् गरेको रोयल च्यालेन्जर्स बैंग्लोरले विराट कोहलीको अविजित अर्धशतकको मद्दतले ६ विकेटमा १८२ रन बनाएको थियो । केकेआरले सुरुदेखि नै धमाकेदार ब्याटिङ गर्दै १७ औं ओभरमा नै लक्ष्य हासिल गर्यो। टोलीले १९ बल बाँकी रहँदै खेल जित्यो । केकेआरको यो लगातार दोस्रो जित हो। आरसीबीले तीन खेलमा दोस्रो हार बेहोरेको छ ।
कोहलीले ५९ बलमा चार छक्का र चार चौकासहित ८३ रनको अविजित इनिङ खेल्नुका साथै क्यामरन ग्रीनसँग दोस्रो विकेटका लागि ६५ र ग्लेन म्याक्सवेलसँग तेस्रो विकेटका लागि ४२ रनको साझेदारी गरे। ग्रीनले ३३ रन बनाए भने म्याक्सवेलले २८ रन बनाए । दिनेश कार्तिकले अन्तिममा आठ बलमा तीन छक्का प्रहार गर्दै २० रन बनाए । केकेआरका लागि आन्द्रे रसेल र हर्षित राना २-२ विकेट लिए ।
लक्ष्य पछ्याउँदा सुनिल नारायण र साल्टले पहिलो विकेटका लागि ८६ रनको साझेदारी गर्दै जितको जग बसाएका थिए । नारायणले ४७ रनको उत्कृष्ट पारी खेले । यसपछि वेंकटेश अय्यरले बाँकी ५० रन पूरा गरे ।